OÉ-CUSSE 06 fevereiru 2023 (TATOLI) – Diretór empreza Lifau-Indah Unipesoál Lda, Fernando Max, promete bainhira udan para sei halo normalizasaun estrada Kutete tanba hetan estragu hosi dezastre naturál.
“Ita-nia servisu ne’e remata ona, tanba ita servisu tuir, hosi konkursu públiku ne’e maka ita hala’o maibé agora ita haree tanba udan la fó fatin, iha duni realidade fatin ida iha Nenuk ne’e, ita haree rai halai tanba ne’e dezastre naturál, maibé ami hanesan kompañia na’in, iha responsabilidade, sé udan-ne’e para ami tenke ba ajuda hadi’a fali estrada ida-ne’ebé mak kotu tanba hetan dezastre, ami tenke hadi’a fali tanba nu’udar Oé-Cusse oan,” Fernando Max.
Nia hatutan, tuir loloos haree ba dokumentu kontratu, ba konstrusaun ne’e hetan dezastre la’ós tanba sei iha tempu retensaun, maibé ne’e hanesan responsabilidade morál ne’e nafatin iha para hadi’a estrada ne’e, atu fasilita movimentasaun transporte públiku no privada inklui lori produtu ba merkadu ho situasaun di’ak.
“Maibé agora tanba udan, ita ba hadi’a agora mós sei monu nafatin, ita haree estrada monu no nakfera ne’e tanba udan, maibé bainhira udan para, ami sei hadi’a fali, ami kompañia sempre iha responsabilidade, maske la tama iha item retensaun maibé ita sei ba ajuda,” nia promete.
Diretór empreza ne’e haktuir, daudaun ne’e makina eskavatór unidade rua mantein iha Kutete, hodi ajuda prepara karik akontese tán iha fatin seluk bele halo normalizasaun, maibé ida-ne’ebé hetan estragu grave, sei hadi’a iha tempu ikus bainhira udan para.
Entretantu, projetu reabilitasaun estrada rurál ne’e ezekuta ho valór kontratu hamutuk $2,623,959.80 Autoridade RAEOA prevee hosi Orsamentu Jerál Estadu (OJE) 2022 nian.
Reabilitasaun estrada rurál hosi suku Bobokase liga ba bairru Kutete, aldeia Mahata, suku Costa ho distánsia kilómetru 14, manutensaun estrada ne’e nia médida metru-lima, kompleta ho valeta, ponte boot ida no ponte ki’ik hamutuk 10 no moru kontensaun.
Tuir dadus bazea dokumentu cesta bázika 2021 nian, totál komunidade iha aldeia mahata hamutuk 1,899 mane 908 feto 991. Iha suku Bobkokase hamutuk 3,105 1,592 mane no feto1,513 komposta hosi aldeia Fatubijae no aldeia Bihala.
Notísia relevante: Autoridade sei husu empreza hadi’a estrada Kutete tanba hetan estragu
Jornalista: Abílio Elo Nini
Editór: Evaristo Soares Martins
