ATAÚRO, HEADLINE

Ataúro komprometidu luta kontra diskriminasaun hasoru feto

Ataúro komprometidu luta kontra diskriminasaun hasoru feto

Komemorasaun loron mundiál feto iha Ataúro. Imajen/Boneca de Atúro

ATAÚRO, 08 marsu 2023 (TATOLI) – Feto no komunidade Ataúro halibur malu iha kuarta ne’e iha Ataúro vila hodi selebra loron mundiál feto no komprometidu atu firmi hakilar nafatin hodi kombate dezsigualdade, violénsia kontra feto no labarik feto, no diskriminasaun oioin hasoru feto iha munisípiu Ataúro.

Komemorasaun loron mundiál ne’e organiza husi kooperativa Boneca Ataúro, ho objetivu atu kombate diskriminasaun oioin kontra feto no labarik feto iha sosiedade Timor-Leste, liuliu iha Ataúro.

Atividade ba komemorasaun loron refere inklui Marsa ba paz, atividade fahe informasaun, jogu, aprezentasaun múzika tradisionál sira no seluktan.

“Ita selebra atividade ne’e ba dala ualu ona. Komemorasaun ida nee atu fó hanoin ba inan-feton sira no labarik feto hotu kona ba sira ninia direitu. Loron ida ne’e mós espesiál ba ita atu luta ba halakon dezigualdade jéneru, violénsia doméstika no diskriminasaun oioin hasoru feto no labarik feto,” Prezidente Kooperativa Boneca Ataúro, Virginha Soares ba jornalista sira hafoin komemorasaun loron espesiál ne’e iha Ataúro.

Notísia relevante:Kooperativa Boneca Ataúro hetan rendimentu US$23 milliaun kada tinan

Dirijente ne’e haktuir katak dezigualdade sai hanesan dezafiu boot ba sosiedade Timor-Leste, tanba ne’e mak feto presiza hakilar nafatin hodi luta ba feto nia direitu. “Ita tenke serbisu maka’as hodi atinji igualdade jéneru iha área oioin – edukasaun, saúde, polítika, no seluktan.”

“Ami rekomenda ba governu Timor-Leste atu luta maka’as hodi asegura feto nia direitu iha sosiedade, no halakon violénsia kontra feto no labarik. Ita presiza hakilar no firmi nafatin implementa asaun koletivu no konkretu ba kombate dezigualdade,” nia afirma.

Virginha hato’o votu parabéns ba feto iha mundu tomak, Timor-Leste no feto Ataúro.

Iha fatin hanesan, Administradór Munsípiu Ataúro, Domingos Soares hateten, nesesáriu tebes atu enkoraza no promove inan-feton sira hodi asegura igualdade jéneru iha sosiedade atu kontribui ba dezenvolvimentu nasionál.

“Ita konta ho feto Ataúro nia partisipasaun, ita sei halo planu para hodi kontiniua luta hasoru dezigualdade iha Timor-Leste no Ataúro. Ha’u-nia parabéns ba feto iha mundu tomak, feto Timor-Leste no inan-feton sira iha Ataúro,” autoridade munisipál ne’e kongratula.

Notísia relevante:GMPTL: papél feto iha dezenvolvimentu importante

Jornalista     : Filomeno Martins 

Editór             : Rafael Ximenes de A. Belo

iklan
iklan

Leave a Reply

iklan
error: Content is protected !!