DILI, 26 maiu 2023 (TATOLI)—Prezidente Parlamentu Nasionál, Aniceto Longuinhos Guterres Lopes, hateten partidu balun lakon ka manán iha eleisaun parlamentár ne’e prosesu demokrátiku hodi simu desizaun povu.
Notísia Relevante: Rezultadu kontajen finál iha STAE, CNRT hetan vitória iha Elpar 2023
“Primeiru ita foin eleisaun hotu, ita hotu asiste eleisaun la’o di’ak no kalma kompara ho eleisaun anterior. Parese ida-ne’e, di’akliu. Biar balun dehan ladi’ak, agora partidu balun lakon ka manán ne’e kestaun seluk no prosesu ne’e hanesan demokrátiku ida la’o di’ak,” Prezidente Parlamentu Nasionál ne’e hateten ba jornalista sira hafoin ramata enkontru ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, sesta ne’e.
Nia hatutan, ida-ne’e tanba lideransa Estadu ida-ne’e, hanesan Prezidente Repúblika nu’udar Xefe Estadu nia kondúss prosesu ne’e tomak lori Estadu nia naran la’o ho di’ak.
“Nu’udar reprezentante povu, hanesan Prezidente Parlamentu Nasionál mai felisita Prezidente Repúblika ba susesu ida-ne’e,” nia dehan.
Ksolok ne’e timoroan tomak nian nu’udar rai ida-ne’ebé Estadu no nasaun foun nia demokrasia mós sei nurak hela, nivel ida-ne’e bele dehan Timor nia demokrasia agora di’ak no povu kadavés maduru liu.
Nune’e, Prezidente PN ne’e hakarak felisita povu Timor-Leste tomak ne’ebé hatudu ninia maturidade iha prosesu demokrátiku iha Timor-Leste no halo Timor nia demokrásia sai tasak liu, tan ida-ne’e orgullu ba timoroa nian hotu.
Jornalista : Nelson de Sousa
Editór : Cancio Ximenes
