Deputadu KHUNTO husu lejislatura foun fó atensaun ba konstrusaun edifísiu PN

DILI, 29 maiu 2023 (TATOLI)—Deputadu hosi bankada KHUNTO iha Parlamentu Nasionál, António Verdiál de Sousa, husu ba PN iha lejislatura daneen mai atu tau atensaun ba konstrusaun edifísiu foun PN.
Notísia Relevante: MAPKOMS-Ministériu relevante fó solusaun ba instalasaun futuru edifisiu PN
“Reprezenta bankada KHUNTO hodi hato’o tempu lejislatura dalimak mós besik ramata ona ho ida-ne’e fó hanoin ba ita hotu hirak ne’ebé sei fila-fali mai no sira-ne’ebé atu lidera meza, favór boot ida keta haluha tau iha ajenda tenke hala’o ba futuru edifísiu foun Parlamentu Nasionál iha lejislatura daneen tenke hamosu,” Deputadu KHUNTO ne’e hato’o liuhosi reuniaun plenária PN, segunda ne’e.
Nia dehan, mezmu iha lejislatura dalima ne’e bankada KHUNTO apoiu meza Parlamentu Nasionál (PN) husu deputadu sira atu harii edifísiu foun maibé realidade mandatu atu besik hotu la konsege realiza.
Nia mós husu ba Governu foun tuir mai, atu identifika ka atribui rai ba órgaun soberania daruak ne’e hodi bele kontribui edifísiu PN nian, tanba to’o agora seidauk atribui rai ba futuru konstrusaun edifísiu foun Parlamentu Nasionál.
Tanba, nia hateten, kondisaun fatin atuál edifísiu Parlamentu Nasionál liu-liu fatina ba Komisaun permanente hosi komisaun A to’o G ninia situasaun ka kondisaun ladi’ak ona.
Prezidente Parlamentu Nasionál, Aniceto Longuinhos Guterres Lopes, hateten kona-ba edifísiu iha lejislatura ida-ne’e hosi tinan tolu hosi 2020 to’o mai ohin loron, halo esforsu ho mandatu plenária PN nian tenta buat hotu maibé ita ladún hetan apoiu ka koloborasaun di’ak hosi parte sira.
“Klaru ita hotu hanoin katak, tenke iha solusaun tanba ita-nia situasaun pior ba beibeik, tanba iha nesesidade ba Parlamentu edifísiu hodi bele fó kondisaun serbisu di’ak liu ba PN nu’udar órgaun soberania, urjénsia ha’u hein katak lejislatura mai tau atensaun,” nia dehan.
Jornalista : Nelson de Sousa
Editór : Cancio Ximenes

