Membru arte marsiál 300 tuir ezame molok integra ba família PSHT

OÉ-CUSSE, 11 juñu 2022 (TATOLI)–Kandidatu membru pratikánte na’in-300 hosi organizasaun Arte Marsiál Persaudaraan Setia Hati (PSHT) iha Rejiaun Administrativa Espesiál Oé-Cusse Ambeno (RAEOA), domingu ne’e, hala’o ezame eskrita no prátika iha sentru formasaun PSHT nian iha bairru Oésono hodi prepara graduasaun sa’e sintu iha períodu 2023.

Koordenadór PSHT Oé-Cusse, Candido dos Reis Amaral, hateten ezame ne’e fahe ba rua, prátika no eskrita, hanesan rekezitu ida ba kandidatu prátikan sira hodi kumpre molok integra iha família boot organizasaun PSHT.

 Notísia Relevante: Agostu, PSHT halo graduasaun ba membru foun 9.000-resin A

“Ezame ne’e hanesan rekezitu ida ba kandidatu sira atu kumpre, PSHT Oé-Cusse iha komptomisu boot hakarak kontribui ba pás maske ami ultrapasa tinan barak depois ukun-aan. Agradese ba KRAM Oé-Cusse no PNTL ba kooperasaun servisu hamutuk durante ne’e, tanba kria situasaun hakmatek iha Oé-Cusse to’o ohin loron,” Candida Amaral hateten iha abertura ezame ne’ebé hala’o iha sentru formasaun PSHT iha Oésono.

Nia dehan, objetivu hosi ezame ne’e atu forma prátikante sira-nia mentalidade no avalia kapasidade liu-liu ba matéria organizasaun nian molok sa’e sintu nu’udar membru permanente iha família boot organizasaun arte masriál PSHT nian.

Tuir nia, ho kooperasaun ne’e sei kontinua nafatin ba futuru hodi servisu hamutuk tanba Oé-Cusse nu’udar rai enklave, tan ne’e ambiente rai Oé-Cuse persiza pás, domin iha sosiedade nia leet.

Notísia Relevante: KRAM Oé-Cusse suspende ezersísiu arte-marsiál durante períodu kampaña eleitorál  

Prezidente sub-Komisaun Reguladóra Arte Marsiál (sub-KRAM) Oé-Cusse, Zeferino da Cruz Salu, fó hanoin ba kandidatu sira atu persiza kaer metin prinsipiu kultura timoroan nian, atu integra iha komunidade no enkuadra ba desportu, hodi promove unidade nasionál, hakribit violénsia no hadook-asn hosi krime.

“Iha buat rua de’it, integra ba komunidade no enkuadra ba desportu. Ita mai hosi komunidade tama iha organizasaun, ita enkuadra ba iha desportu. Organizasaun hotu iha Timor-Leste, ne’e organizasaun desportiva, tanba ho desportu mak ita hamorin Timor-Leste nia naran iha rai-laran no internasionál,” nia dehan.

Pontu prinsipál rua ne’e importante ba kandidatu sira, atu kaer metin papél Estadu no papél Governu, ida-ne’e mak sai primeiru pontu hanesan sidadaun timoroan ida atu promove unidade nasionál, hakribit violénsia no hadok-aan hosi krime.

“Kuandu ita kaer metin prinsípiu ne’e hanesan volante ema ida-idak nia-aan, tanba ita-nia volante umanu pesoál mak attitude. Se ita-nia atetude ladi’ak, primeiru estraga ita-nia família, estraga organizasaun nia naran no estraga ita-nia aan rasik,” nia hateten.

Komandante interinu PNTL Oé-Cusse, Superintendente, Ludgeripo Picansio Madeira Lay, apela ba kandidatu sira atu atu moris tuir doutrina organizasaun arte marsiál PSHT nian,

“Ha’u husu ita hotu, nu’udar joven atu tama iha organizasaun ida karik hetan treinu, primeiru persiza hatene uluk objetivu hosi ita rasik, tanba saida mak hakarak tama. Tama tanba rame de’it ka tama tanba kuda hela víngansa iha fuan, hodi tama treinu atu uza organizasaun atu balas dendam fali. Se ida-ne’e, di’akliu lalika envolve-aan iha grupu arte marsiál,” nia dehan.

Tanba ne’e, nia husu responsavél organizasaun atu kontrola membru sira-ne’ebé tenta kria instabilidade, persiza fó sansaun hodi selu multa no demite hosi organizasaun arte marsiál.

“Tan ne’e, ha’u husu ba ita hotu, kuandu ita hakarak tuir treinamentu tenke kumpre regra, filozofia PSHT nian persiza kuda didi’ak, nune’e bele serbi ba ema hotu,” nia hateten.

Entretantu, totál membru permanente organizasaun PSHT atuál iha Oé-Cusse hamutuk na’in- 300 liu no membru prátikante kandidatu ba sai família permanente organizasaun PSHT hamutuk na’in-500 liu.

Nune’e mós, durante iha ezame preparasaun ba kandidatura sira, hetan mós partisipante mai hosi responsavél organizasaun arte marsiál KORKA, IKS, Taekwondo no seluk tán.

Notísia Relevante: KRAM halo re-ajustamentu ba estrutura organizasaun arte marsiál iha RAEOA 

Jornalista : Abílio Elo Nini

Editór        : Cancio Ximenes