2021-2023: Governu aloka millaun $15,4 ba PMOPA

DILI, 28 juñu 2023 (TATOLI)—Diretór Jerál Dezenvolvimentu Rurál (DGDR-sigla portugés), Rosito Guterres, hateten hosi tinan 2021 mai to’o 2023, Governu liuhosi Ministériu Administrasaun Estatál (MAE) aloka ona miliaun $15,4 no fó benefísiu ba ema rihun 159 ho atividade 6.200-resin.
Notísia Relevante: MAE aloka millaun $6.3 ba PMOPA
“Iha 2021, iha hahú millaun $3-resin, no ita karrega ba traballadór informál kuaze 29.000, no ita finánsia atividade 1.200-resin. Hosi tinan 2021 to’o mai agora ne’e, ita fó serbisu ba ema hamutuk 159.000,” nia hateten ba Agência tatoli liuhosi programa Entrevista Eskluziva iha estúdiu Farol, kuarta ne’e.
Iha 2022, nia hatutan, Governu aloka milhaun $7.2, no ho osan ne’e hosi Orsamentu Retifikativu nian ne’ebé mak hodi finansia ba sub-atividade hamutuk 3.000 no karrega ba ema 71.000.
“Ita-nia trablladór informál sira-ne’e servisu loron 10 no balun to’o 20. Ida-ne’e mak baibain ema dehan kada grupu iha ema na’in-20 no kada ema hetan osan $5 iha loron ida no nia xefe grupu hetan $7,” nia dehan.
Iha tinan 2023, nia hateten, Governu liuhosi MAE aloka millaun $6.2 ne’e bé finansia ba atividade 2.000-resin.
“Tuir ami-nia supervizaun sei karrega ba ema 59.000. Ita seidauk bele fó sai númeru tanba ita foin mak iha fulan-juñu,” nia dehan.
Nai esplika, programa PMOPA fó opurtunidade ba joven no komunidade iha postu sira atu jere no finansia dezastre natural sira, no kria kampu servisu informál ba joven sira hafoin programa ne’e hanesan forma ida atu hatoman komunidade iha postu antes tama ba poder lokál.
Programa PMOPA ne’e, regula ho diploma ministeriál ida 17/2022, no lei ne’e hateten postu administrativu iha direitu atu hetan subvensaun públika ho montante $100 kada postu ida, no ida-ne’e iha postu 62 tanba iha psotu balun hetan rihun $50 no balun rihun $55.
Maibé, tuir nia, iha diploma ministeriál ne’e liu-liu iha artigu 6, 7 no 8 hateten, iha formula tolu ne’ebé dahuluk dehan postu hotu-hotu sei simu osan 50%, formula daruak mak 25% kada postu hanesan no formula datoluk mak jeografikamente ka distánsia postu nian ne’e.
Jornalista : Osória Marques
Editór : Cancio Ximenes

