Top

Indonézia fasilita Governu TL prepara tékniku sira adere ba ASEAN

Governu Indonézia fasilita Governu Timor-Leste prepara tékniku adezaun TL ba ASEAN. Imajen/Espesiál.

DILI, 28 Juñu 2023 (TATOLI)—Ministériu Negósiu Estranjeiru no Kooperasaun (MNEK) liuhosi Dirasaun Jerál ASEAN Timor-Leste ne’ebé halo kooperasaun tékniku ho Ministériu Negósiu Estranjeiru Indonézia nian liuhosi fó formasaun ba funsionáriu públiku na’in-30 hosi ministériu relevante sira.

Notísia Relevante: PR Horta-Embaixadór Indonézia diskute prosesu adezaun TL ba ASEAN

Liuhosi kooperasaun ne’e grupu dahuluk ho funsionáriu na’in-10 ba pilár sósiu-kulturál dezloka ona ba Jakarta, Indonézia iha 12 juñu 2023, prepara tékniku sira hodi aprende sistema servisu no lala’ok servisu tékniku ASEAN hanesan meu ida fó koñesimentu ba Timor-Leste atu adere ba ASEAN.

“Ita-nia objetivu mak atu halo observasaun no aprende sistema servisu no lala’ok servisu tékniku ASEAN hanesan meu ida fó koñesementu ba ita para bainhira ita adere ona ba ASEAN, Timor Leste mós iha ona rekursu umanu hodi responde ba situasaun ida-ne’e iha termu servisu nu’udar protókolu iha enkontru ASEAN nian,” Ofisiál Gabinete Komandante Komandu Operasaun PNTL ne’ebé hanesan mós xefe delegasaun, Cristian da Costa Dias, hateten iha komunikadu ne’ebé Tatoli asesu, kuarta ne’e.

Grupu daruak hamutuk na’in-16 dezloka ona iha 19 juñu 2023, na-in neen (6) ba pilár polítika seguransa nian no na’in-10 ba pilár ekonómia maihosi Ministériu no Instituisaun Governu nian hanesan MNEK, Ministériu Interiór, Polísia Nasionál Timor-Leste (PNTL), ANC, I.P, Autoridade Aduaneira, Ministériu Agrikultura no Peska (MAP), TradeInvest Timor-Leste, SERVE, I.P, INDMO, I.P, AIFAESA I.P.

Grupu datoluk, hamutuk ema na’in-haat (4) ba pilar polítika seguransa sei to’o iha Jakarta, Indonézia agostu 2023, hodi partisipa atividade formasaun tékniku (capacity building) hanesan aktividade ne’ebe fornese hosi Governu Indonézia hodi suporta Timor-Leste nia Adezaun ba ASEAN.

Nota ne’e hateten, iha vantajen ba Governu Timor-Leste bainhira iha servisu bilaterál hanesan  ho nasaun Indonézia.

“Ha’u-nia pontu de vista, ita hetan suporta ne’ebé máximu hosi Governu Indonézia ba atividade iha pilár hotu (polítika-seguransa, ekonómia no sósiu kulturál), ita persija esforsu-aan hodi hapar ho sistema ASEAN atu implementa, liu-liu rekezitu sira-ne’ebé ita persija kompleta hodi sai membru permanente iha ASEAN. Ida-ne’e vantajen ba Governu Timor-Leste, bainhira iha servisu bilaterál hanesan ho nasaun Indonézia no karik iha posibilidade ita mós aprende tan ho nasaun seluk ne’ebeé sai ona membru ASEAN, liu-liu hanesan Vietnam. Tanba sira mós mai aprende iha Indonézia hanesan ita agora. No, agora benefísiu hosi ASEAN halo nasaun Vietnam avansadu ona iha aspetu oioin,” nota ne’e dehan.

Iha semana dahuluk ne’e, partisipante ba formasaun refere hetan introdusaun ba mekanizmu servisu hamutuk ASEAN nian no relasaun bilaterál entre Timor-Leste no Indonézia, hosi MNEK no Sekretariadu ASEAN nian no ajenda refere foka liu ba pilár rua ASEAN nian mak polítika seguransa no ekonómia.

Semana tuir mai partisipante sira sei koloka ba kada ministériu tuir ida-idak nia instituisaun ka ministériu ne’ebé relevante ho ida-idak nia servisu, formasaun refere ho durasaun fulan tolu no sei termina iha setembru 2023.

Jornalista : Osória Marques

Editór      : Cancio Ximenes

Publisidade

Leave a Reply

Latest Post

error: Content is protected !!