DILI, 01 jullu 2023 (TATOLI)—Sábadu (01 jullu 2023), atu tama ba tuku 16h00 lorokraik ne’e, matan atus ba rihun tuda-fihir ba Palásiu Prezidensiál Nicolau Lobato, Bairru Pité, Dili, atu hamatan ba serimónia toma pose ba IX Governu ne’ebé lidera hosi Primeiru-Ministru, Kay Rala Xanana Gusmão.
Notísia Relevante: Kór bandeira RDTL orna Palásiu PR sai “Jardin” pose ba IX Governu
Iha lorokraik ne’e, iha Palasiu Prezidensiál Nicolau Lobato nia tatis, ema hotu sai sasin ba prosesu toma pose ba membru IX Governu ne’ebe sei halaó kna’ar iha períodu 2023-2028.
Hori hahú kedas iha tuku 14h00, konvidadu no komunidade sirav iha kapitál Dili hahú hakat hakbesik ba resintu Palásiu Prezidensiál.
Iha leet be mamuk no manas, membru IX Governu ida-idak hahú hakat tama ba resintu Palásiu Prezidensiál Nicolau Lobato, hodi hola fatin ne’ebé hatuur iha palku kalaran loloos, ne’ebé komisaun organizadora prepara kadeira falun hena mutin no kesi ho laxu kinur be kinur.
Nune’e mós, hosi sikun ba leet, bainaka importante sita hosi nasaun seluk hahú hola fatin iha kadeira be falun ho hena mutin no kesi ka bobar ho laxu mean ne’e, hodi tuur no hein serimónia pose hahú.
Iha membru IX Governu nia leet, marka mós prezenza Arsebispu Arkidiozese Metropolitana Dili, Dom Virgílio Kardeál do Carmo da Silva, SDB, hodi partisipa serimónia toma pose ne’e.
Serimonia tomada posse ne’e rasik hahú oras 16h00 lorokraik maibé realidade lidér nasionál na’in-rua (2), Francisco Guterres Lú Olo no Marí Bin Amude Alkatiri, la mrka prezensa iha serimónia toma pose ba IX Governu ne’e, maske komisaun organizadora fó mós konvite ba eis titulár sira.
Maibé, haree be haree, iha loron be manas no iha ema ua’in nia leet, hakat ho domin no mosu Primeiru-Ministru Sesante, Taur Matan Ruak, akompañadu hosi nia oan-feto Tamariza Ruak to’o iha resintu Palasiu Prezidensial iha tuku 15h34.
Hosi dook, iha loron no anin be manas nia leet, Promeiru-Ministrru sesante, hatais kamizola mutin ho kazaku metan, kaer metin nia oan feto nia liman ne’ebé hatais vistuáriu Tais Timor, hosi hakat ho domin no ho esperansa hodi hakat sa’e palku leten hodi hola fatin.
Leet mamuk uitoan, iha tuku 15h32, mosu Jenerál Lere Anan Timur mós hakat tama ba resintu Palásiu Prezidensiál Nicolau Lobato ho oin midar no hatudu hamnasa mihis ba konvidadu sira seluk ne’ebé mai uluk.
Jenerál Lere Anan Timur ne’ebé la akompaña hosi ema ruma, ne’e uza kamizola mean no kazaku kór army (militár nian).
Nune’e mós, hein be hein, iha tuku 15h42, Líder Kárismatiku Kay Rala Xanana Gusmão mós tun husi karreta hodi hatudu hamnasa mihis bae ma hotu no komunidade simu ho basa liman.
Xanana Gusmão hatudu oin-midar ba ema hotu ho nia hatais kazaku no kamizola mutin, no bainhira nia hakat tama ba palku leten, konvidadu noa ema hotu hamriik hodi simu ho domin tomak.
Tuir observasaun maioria membru governu ne’ebe simu posse iha lorokraik ida ne’e uza kamizola mutin no ba ministra sira ho vestura ne’ebé mistura ho tais.
Iha serimonia ne’e partisipa mos husi eis membru VIII Governu Konstitusionál, eis titular sira, releijiosa, asosiasaun no organizasaun naun governamentál sira.
Jornalista : Cidalia Fátima
Editór : Cancio Xiemenes
