CNC husu PN tau matan ba reparasaun vítima libertasaun nasionál

DILI, 17 jullu 2023 (TATOLI)—Diretór Ezekutivu Centro Nacional Chega (CNC), Hugo Maria Fernandes, husu Parlamentu Nasionál (PN) iha lejislatura daneen ne’e atu tau matan ba asuntu reparasaun vítima durante iha funu ba luta libertasaun nasionál.
Notísia Relevante: Governu presiza kria medida reparasaun ba vítima violasaun seksuál iha pasadu
“Husu ba Parlamentu Nasionál atu tau matan ba asuntu serbisu reparasaun ba vítima sira, aprova rezolusaun kona-ba ema lakon no mós husu atu bele halo esforsu ida ba Ministéiru Administrasaun Estatál atu bele aprezenta lalais lei arkivu, ubmete mai iha Parlamentu Nasionál atu bele hetan aprovasaun hosi Parlamentu,” Diretór Ezekutivu CNC ne’e hateten ba jornalista sira hafoin ho ekipa ramata enkontru ho Prezidente Parlamentu Nasionál (PPN), Maria Fernanda Lay, iha sala konferénsia PN, segunda ne’e.
Nia hateten, inisiativa sira kona-ba ida-ne’e antes ne’e iha ona maibé la konsege kontinua, no PPN ohin rekoiñese katak iha tinan hirak liu ba kona-ba reparasaun iha tiha ona dekreitu-lei maib’e depois iha tesik mai buat ne’e lakon tiha, no ohin Prezidente Parlamentu husu para depois Centro Nacional Chega bele aprezenta fila-fali depois sira bele diskute.
Kona-ba lei arkivu no pedidu ba Parlamentu atu ratifika konvensaun kona-ba ema lakon ne’e, nia dehan, ida-ne’e mós hanesan tanba uluk tama ba iha diskusaun ho komisaun espesializada sira detallu liután
Iha biban ne’e, Diretór Ezekutivu CNC ho estrutura hala’o enkontru hodi kongratula Deputada Maria Fernanda Lay, hanesan feto Timor-Leste hetan fiar eleita sai Prezidente Parlamentu Nasionál iha lejislatura daneen
Durante sorumutu, CNC mós atualiza serbisu ho apoiu hosi konsellu asesória internasionál mai hosi nasaun oioin.
Notísia Relevante: PN-Governu bele inisia submete lei reparasaun vítima atu diskute
Jornalista : Nelson de Sousa
Editór : Cancio Ximenes

