DILI, 28 jullu 2023 (TATOLI)–Prezidente Konsellu Kombatente Libertasaun Nasionál (CCLN), Vidal de Jesus “Riak Leman”, hateten verifikasaun dadus veteranu rejistadu 2009 ne’e hein Orsamentu Retifikativu (OR) hafoin kontinua no halo validasaun ba dadus.
Notísia Relevante: Verifikasaun dadus veteranu rejistadu 2009 atinje ona 90%
“Ami hein orsamentu retifikativu hafoin kontinua fali ho verifikasaun dadus veteranu rejistadu 2009 nian. Tanba, ita ba halo verifikasaun ne’e presiza osan mak ba halo viajen, han-hemu no ba nesesidade seluk. Bainhira orsamentu retifikativu sai ona mak ita hahú halo verifikasaun ne’e,” Riak Leman hateten ba Agência Tatoli liuhosi telefónika, sesta ne’e.
Tuir dadus, veteranu iha territóriu nasionál ne’ebé mak rejistu iha 2009 no ekipa verifikadór sira halo verifikasaun ne’e hamutuk124,680.
“Ita halo verifikasaun ne’e seidauk hotu no ita foin konklui mak 75% (93.000) no 25% seidauk hotu, nune’e hein orsamentu retifikativu mak bele kontinua fali halo verifikasaun,” nia hateten.
Iha Estatutu Kombatente Libertasaun Nasionál, lei númeru 3/2006 iha artigu 13 ne’e hateten, registo da Qualidade de Combatente da Libertação Nacional sei kontinua hala’o validasaun rejistu ba períodu daruak nian ba rekoñesimentu Kombatente hanesan Libertasaun Nasionál ne’ebé rejista iha tinan 2009.
Notísia Relevante: Posibilidade Governu foun mak sei halo validasaun dadus veteranu rejistadu 2009
Jornalista : Osória Marques
Editór : Cancio Ximenes
