Funsionáriu públiku TL partisipa “Internship Program” iha Indonézia
DILI, 18 agostu 2023 (TATOLI)—Ministériu Negósiu Entranjeiru Indonézia realiza serimónia resepsaun ba funsionáriu públiku Timor-Leste na’in-26 no daudaun ne’e iha Jakarta no na’in-haat (4) seluk partisipa Programa Internship ba prosesu adezaun Timor-Leste ba ASEAN.
Notísia Relevante: PN sei kria komisaun ida apoiu Timor-Leste adere ba ASEAN
Serimónia resepsaun ne’e realiza liuhosi kooperasaun entre Ministériu Negósiu Estranjeiru no Kooperasaun (MNEK) Timor-Leste ho Ministériu Negósiu Entranjeiru Indonézia ne’e, hala’o iha edifísiu Ministériu Negósiu Estranjeiru Indonéza nian.
“Ojetivu serimónia ne’e atu hametin liután amizade entre nasaun rua hodi kapasita funsionáriu públiku Timor-Leste durante Internship Program liuhosi ministériu oioin no ajénsia iha Repúblika Indonezia,” Diretór Jerál Koopersaun ba ASEAN, Sidharto R. Suryodipuro, hateten liuhosi komunikadu ne’ebé Tatoli, asesu, sesta ne’e.
Programa ida-ne’e sai hanesan oportunidade ne’ebé mak di’ak tebes no úniku ba funsionáriu públiku Timor-Leste atu observa no partisipa diretamente ba realizasaun enkontru ASEAN nian, no hein katak partisipante sira bele lori esperiénsia ne’ebé mak hetan no implementa fila-fali atu nunee bele ajuda Timor-Leste bele hetan nia estatutu sai membru permanente iha ASEAN.
Funsionáriu tékniku hirak-ne’e maihusi Ministériu no Instituisaun ne’ebé relevante ba pilar tolu hanesan pilar ba ASEAN Economy Community (AEC), ASEAN Security Political Community (ASPC) no ASEAN Socio-Cultural Community (ASCC).
Direktór Ezekutivu Institutu Fundu Internasionál Kooperasaun ba Dezenvolvimentu, Tormarbulang Lumbantobing, hateten programa ida-ne’e la’ós de’it importante atu hasa’e kapasidade no koñesimentu maibé mós atu haforsa relasaun bilaterál entre Indonézia no Timor-Leste iha unifikasaun ASEAN.
Reprezentante ekipa estájiu, Lidia Aquelina Imaculada, hateten apresia tebes ba programa ida-ne’e tanba antes atu hala’o estájiu iha ministériu no instituisaun relevante, sira partisipa uluk programa familiarizasaun iha Ministériu Negósiu Estrajeiru, Ministru Koordenadór asuntu polítika, Justisa no Seguransa, Ministru Koordenadór asuntu dezenvolvimentu Umanu no Kultura, Ministru Koordenadór Asuntu Ekonómia, Sekretaridu ASEAN, nune’e mós hosi instituisaun relevante sira seluk.
“Ami estajiáriu sira mós hetan oportunidade hodi partisipa formasaun lingua inglés liuhosi kooperasaun entre Ministériu Negosiu Entranjeiru Indonézia no Embaixada Inglaterra iha Jakarta, Indonézia,” nia dehan.
Iha serimonia respsaun ne’e hetan partisipasaun másimu hosi Embaixadór Timor Leste ba Nasaun Indonézia, Diretór Jerál Kooperasaun ASEAN, Komisaun Reprezentante Permanente ba ASEAN, Embaixada UK ba Indonézia, Deputy Sekretariu Jeral ASEAN Political Security Council, Ofisiál Ezekutivu Indonézia ba Ajénsia Dezenvolvimentu Internasionál, Ofisial Senior ASEAN Sectoral Bodies Repúblika Indonézia no liña ministeriál no instituisaun relevante sira-ne’ebé mak estajiáriu sira hala’o sira-nia estájiu ba.
Jornalista : Osória Marques
Editór : Cancio Ximenes
