DILI, 31 agostu 2023 (TATOLI)—Ministru Administrasaun Estatál (MAE), Tomás do Roasário Cabral, hateten, munisípiu Ataúro la prienxe lei asembleia munisipál tanba nia eleitór la to’o 33.000 to’o 50.000.
Notísia Relevante: Governu sei muda estatutu munisípiu Ataúro sai rejiaun
“Kuandu sai munisípiu ida tenke prienxe rekezitu ba asembleia munisipál mak eleitór 33.000 to’o 50.000, agora eleitór Ataúro iha 6.000 to’o 9.000 de’it,” Tomás Cabral hateten ba jornalista sira, iha salaun Delta Nova, kinta ne’e.
Tanba ne’e, nia hateten, arte relevante sei diskute estatutu Ataúro tanba Governu anteriór kria tiha ona poder lokál maibé lei ida ba assembleia munisipál la prienxe rekezitu.
“Ha’u hanoin lei orgánika promulga ona no Ataúro sei trata ho nia autoridade Espesiál ida ba Governu rejionál ida-ne’ebé tutela diretamente Governu sentrál. Estatutu atu hanesan Oé-Cusse maibé Oé-Cusse boot liu no prienxe rekezitu ba asembleia munisipál no tanba ne’e mak Oé-Cusse iha RAEOA ho ZEEMS no Ataúro sei trata ho nia espesialidade ida. Ataúro ne’e ZEEMS ketak, MAE trata liu mak asuntu Administrasaun ba povu sira iha ne’ebá,” nia hateten.
Nia sei la integra ho Dili tanba Governu sentrál hasai ona nia ba munisípiu maibé tanba de’it nia la prienxe rekezitu ba asembleia munisipál nian.
“Tanba ne’e mak ita halo fali estatutu ida mak Governu rejionál ida iha asembleia konstrutivu munisipál permanente, nune’e oinsá sira bele jere mesak sira-nia rekursu iha ne’ebá.
Governu sentrál deklara ona katak sira sei goza sira-nia direitu no sira-nia Administrasaun mai direita MAE,” nia dehan.
Notísia Relevante: PM Xanana: “Loron 120 sei anula lei kria munisípiu Ataúro-konsolida pás”
Jornalista : Osória Marques
Editór : Cancio Ximenes
