Top

Assanami husu mate restu 12 Novembru halakan nafatin lilin revolusionáriu

Sobrevivente Masakre 12 Novembru 1991, Sergio Marques ‘Amali’ tr hela iha semitériu Santa Crus bainhira militár Indonézia tiru namanas jvende lorico asswa’in ne’ebé halo manifestasaun iha tempu ne’ebá. Imajen/Espesiál

DILI, 12 novembru 2023 (TATOLI)–-Vise Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rurál no Habitasaun Komunitária, Mariano Asanami Sabino, husu ba mate restu 12 Novembru atu halakan nafatin lilin revolusionáriu tuir ida-idak nia papél.

Notísia Relevante: Militár Sira Lori Karreta “HINO” Sama-Mate Vítima Masakre Santa Cruz

Vise-Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino. Imajen Tatoli/Francisco Sony

“Ha’u husu ba kompañeru, kompatriota, Kamarada no lutadór sira katak ita-nia mate restu ne’e hanesan lilin ida-ne’ebé ema ida-ida tenke halakan nafatin iha komunidade nia leet. Maske ohin balun sai deputadu, balun sai membru Governu, balun sai autoridade lokál, sai agrikultór no balun iha sosiedade sivíl maibé ita-nia mate restu ne’e la bele mate. Ita tenke halakan nafatin lilin revolusionáriu ne’e hodi la’o nafatin ba oin iha papél ida-idak nian,” Assanami hateten iha diskursu komemorasaun loron masakre 12 novembru ba dala 32 (12 novembru 1991-12 novembru 2023) ne’ebé selebra iha semitériu Santa Crús, domingu ne’e.

Mate restu sira hotu atu kontinua halakan nafatin lilin revolusionáriu ida-ne’e, atu labele husik oportunidade ba buat sira-ne’ebé la importante buras iha komunidade nia leet.

Nia husu, buka organiza aan nafatin no halibur malu iha komunidade nia leet atu lori juventude jerasaun foun sira aprende no koñese istória rai ida-ne’e nian.

Notísia Relevante: Sé Mak Responsabiliza? Xanana Gusmão!

“Ho nune’e, joven sira agora ne’e bele iha de’it tempu atu kontribui ba páss no estabilidade liuhosi hametin unidade ne’ebé eroi sira husik hela ba rai ida-ne’e,” nia dehan.

Tanba, tuir nia, juventude loriku asswa’in sira-ne’ebé fakar raan iha masakre 12 novembru ne’e hakarak lori Estadu ida no lori Timor ne’e ba oin sai Timor ida-ne’ebé fó iis ba ema hotu no fó moris ba ema hotu.

Tanba ne’e, mate restu sira hotu tenke hamutuk nafatin hodi foti Timor-Leste ne’e ba oin, tanba ida-ne’e mak relevante ba sira-ne’ebé mak fó ona sira-nia vida ho totalidade ba rai ida-ne’e.

“Sira nia mate mak sosa ita-nia liberdade, sira nia mate mós atu fó ezemplu ida hodi lori mensajen kontinuasaun, katak ita bele partidu oioin no organizasaun oioin maibé labele sobu ita-nia unidade ba Estadu ida,” nia hateten.

Notísia Relevante: “Ha’u Responsável Ba Manifestasaun, La’ós Ba Masakre”

Jornalista : Tomé Amado

Editór        : Cancio Ximenes

Publisidade

Leave a Reply

Latest Post

error: Content is protected !!