DILI, 20 novembru 2023 (TATOLI)—Responsável ba Dirasaun Kazu iha Uma Mahon iha Fundasaun Forum Komunikasaun Juventude (F-FCJ, siglá portugés), Domingas Pereira, husu Prezidente Repúblika (PR), José Ramos Horta, atu tetu didi’ak molok atu promulga projetu-lei númeru 5/2016, 25 maiu kona-ba Prosedimentu Konseisaun Indultu no Komutasaun Pena.
Notísia Relevante: PN aprova projetu-lei indultu iha finál globál ho votu a-favór 36
“Kontente loos ho lei protesaun labarik nian, maibé agora atu sees uitoan hosi ne’e katak ita-nia lei foun ne’ebé agora daudaun mosu lei kona-ba indultu nian. Hanesan ema-ne’ebé serbisu ba labarik ami mós sente lei ne’ebé agora pasa ona iha Parlamentu, hein atu ba Prezidente Repúblika nia fatin. Ha’u hein katak, Prezidente ema-ne’ebé mak koñesidu iha nasaun ida-ne’e nian. Ha’u hein katak, bainhira atu promulga di’ak atu haree no lee lai,” nia hateten ba Agência liuhosi programa “Entrevista Eskluziva” ho topiku “Asisténsia F-FCJ ba Labarik Siara iha Timor-Leste”, iha estúdio Faról, segunda ne’e.
Se lae, nia hateten, ema hotu konsiente atu halo sala, tanba se triste liu se projetu-lei númeru 5/2016, 25 maiu kona-ba Prosedimentu Konseisaun Indultu no Komutasaun Pena ne’e, Prezidente promulga duni entaun lei protesaun ba labarik ne’e saugate de’it.
“Tanba ema hotu koko halo abuzu seksuál no violénsia oioin, triste liu tanba ita-nia vítima sira sei la hetan sira direitu ba futuru no ema hotu konsiente atu halo sala,” nia hateten.
Nia parte lee uitoan onja projeitu-lei ne’e no bainhira ba PR promulga ne’e konsiente ema hotu atu bele halo krime liuliu mak ba kazu abuzu seksuál, kazu ba menór sira.
“Entaun ema hotu ne’ebé sai sala bele sai loos iha momentu ne’eba, di’ak atu indultu ne’e halo ba kazu ne’ebé la’ós ba menór sira ou ba kazu abuzu seksuál ka violánsia seksuál sira,” nia dehan.
Ida-ne’e, tuir nia, hanesan hanoin hakarak hato’o bainhira projetu-lei ne’e promulga mak signifika karik lei protesaun ba labarik sei laiha funsaun iha ne’eba, tanba iha ona lei fó dalan ba ema seluk kontinua halo sira nia hahalok aat.
Notísia Relevante: FRETILIN kontra totál projetu alterasaun lei indultu
Jornalista : Nelson de Sousa
Editór : Cancio Ximenes
