PPN: Bankada FRETILIN rejeita kandidatu komisáriu CAC Sérgio Hornai

DILI, 23 Novembru (TATOLI)—Prezidente Parlamentu Nasionál, Maria Fernanda Lay, hateten bankada FRETILIN mak rejeita kandidatu komisáriu Komisaun Antí-Korrupsaun (CAC, siglá portugés), Sérgio Hornai, ne’ebé Governu aprezenta mai Parlamentu Nasionál (PN).
Notísia Relevante: Adérito sei aprezenta fali pedidu retira kandidatu komisáriu CAC ba KM
Tanba ne’e, nia hateten, atu ajenda eleisaun ba kandidatu komisáriu Komisaun Antí-Korrupsaun ne’e depende hosi Governu.
“Ne’e depende hosi Governu, tanba bankada FRETILIN lakoi Sérgio. Ne’ebé, ha’u hanoin normál. Uluk mós ami la aseita, no ami mak husu duni iha kandidatu rua. Maibé kandidatu rua bankada FRETILIN la konkorda, sira hakarak ida de’it para ami determina,” Prezidente PN ne’e hateten ba jornalista sira iha Palásiu Prezidensiál Nicolau Lobato, Bairru Pite, kinta ne’e.
Prosesu negosiasaun la’o hela no fiar IX Governu Konstitusionál mós sei toma atensaun ba asuntu ne’e.
Iha parte seluk, nia hateten, instituisaun kontrolu la’ós de’it CAC maibé iha instituisaun seluk ne’ebé tau matan ba probelma korrupsaun.
“Agora, ha’u-nia pergunta mak ne’e, auditória kámara konta ba para hotu iha Prokuradória Jerál Repúblika (PJR) ne’e halo nusa. Prosesu ida ita tenke tau matan, tanba CAC hetan saida mós haruka hotu ba PJR, agora PJR la fó segimentu tanba iha problema. Nune’e, impaktu direta laiha, investigasaun la’o iha parte PCIC, PJR, polísia mós la’o,” nia dehan.
Antes ne’e, Governu liuhosi reuniaun Konsellu Ministru (KM), aprova proposta rezolusaun, ne’ebé aprezenta hosi Primeiru-Ministru kona-ba naran sira hanesan Sérgio de Jesus Fernandes da Costa Hornai no Rui Pereira dos Santos ne’ebé propoin ba PN ba kargu Komisáriu CAC hodi hetan aprovasaun.
Tuir lejizlasaun ne’ebé vigora, naran sira-ne’ebé propoin hosi Governu, ne’ebé analiza no vota hosi PN no sira-nia designasaun sei presiza maiória absoluta hosi Deputadu ne’ebé marka prezensa, pelumenus 3/4 hosi Deputadu ho funsaun efetiva.
Nune’e, liuhosi bankada parlamentár sira liuliu bankada CNRT halo ona komunikasaun ho bankada FRETILIN ba kandidatu komisáriu CAC ne’ebé hetan ona entendimentu molok ajenda eleisaun iha plenária.
Iha entendimentu ne’e bankada FRETILIN husu atu bele Governu retira kandidatu na’in ida hosi kandidatu na’in-rua ne’ebé Governu aprezenta hodi avansa de’it na’in-ida, tanba intensaun FRETILIN nian hakarak kandidatu komisáriu CAC ida konsensuál.
Nune’e, agora PN hein Governu deside retira kandidatu Komisáriu CA na’in-ida hosi kandidatu na’in-rua ne’ebé antes ne’e submete hafoin ajenda ba eleisaun iha plenária.
Jornalista : Nelson de Sousa
Editór : Cancio Ximenes

