Joven tenke komunga espíritu nasionalizmu no patriotizmu iha fuan

DILI, 28 novembru 2023 (TATOLI)–Prezidente Konsellu Kombatente Libertasaun Nasionál (CCLN-sigla Portugés), Vidal de Jesus “Reak Leman”, husu joven sira hotu iha Timor-Leste katak tenke komunga espíritu nasionalizmu no patriotizmu iha fuan.
Notísia Relevante: PROKLAMASAUN 28 NOVEMBRU 1975 Matadalan ukun rasik aan

“Ita-boot sira tenke komunga espíritu nasionalizmu no patriotizmu iha fuan. Ita luta kle’ur hodi ukun aan tanba ne’e tempu ona hodi halo dezenvolvimentu ba ita rain no ba povu doben Timor-Leste. Ida-ne’e mak ita bolu eespíritu nasionalizmu duni, tanba nune’e ha’u husu ba imi joven tenke banati tuir ida-ne’e,” Reak Leman hateten ba Agência Tatoli hateten ba Agência Tatoli liuhosi telefónika, relasiona Timor-Leste komemora loron proklamasaun indenpendénsia ba dala-48 (28/11/23-28/11/23) ho tema “Celebrar a História e Construir o Futuro”, tersa ne’e.
Bainihira ko’alia kona-ba dezenvolvimentu rai laran mak presiza hametin esperitu nasionalizmu no patriotizmu, nune’ejoven mós bele fó nia kontribuisaun ba dezenvolvimentu nasionál.
“Ita nafatin ko’alia estabilidade, la kria pás no unidade, konserteza Governu labele hala’o dezenvolvimentu. Bainihira dezenvolvimentu laiha mak aumenta dezempregu iha rai-laran. Tanba ne’e hotu-hotu tenke komunga espíritu nasionalizmu no patriotizmu iha fuan,” nia esplika.
Iha komemorasaun loron proklamasaun independénsia 28 novembru ba dala-48 (28 novembru 1974-28 novembru 2023) hanesan loron istórika Timor-Leste nian, nune’e husu ba veteranu sira-ne’ebé luta ba pátria ne’e mós tenke hamutuk ho joven atu hametin nasionalizmu ne’ebé maihosi situasaun funu.
“Ami uluk halo funu ami la manán osan ida no manán mak fakar raan ho ruin no balun to’o mate. Ida-ne’e nasionalizmu. Iha funu ne’e, ema hotu hola parte. Nune’e, ha’u hakarak fó hela mensajen ba jerasaun foun sira, ita-nia avó sira luta ba indenpendénsia ona no ita oan sira tenke kontinuia sira-nia istória sira-ne’e, maibé importante primeiru mak kria pás no estabilidade,” nia hateten.
Notísia Relevante: Loron Proklamasaun Independénsia sai istória importante ba povu Timor-Leste
Jornalista : Osória Marques
Editór : Cancio Ximenes

