OÉ-CUSSE, 18 dezembru 2023 (TATOLI – Ekipa Komisaun Tranzisaun IX Governu Konstitusionál, lideradu Sebastião José Luis dos Santos Pereira, segunda ne’e konklui ona avaliasaun ba relatóriu sira ba mandatu Autoridade Rejiaun Administrativa Espesiál Oé-Cusse Ambeno (RAEOA).
Notísia relevante: Komisaun Tranzisaun simu ona relatóriu hosi Autoridade RAEOA
Koordenadór Komisaun Tranzisaun, Sebastião Joseé Luis dos Santos Pereira, hateten, durante prezensa ekipa Tranzisaun iha RAEOA, simu ona relatóriu hosi Prezidente Autoridade RAEOA ho estrutura.
Maibé ekipa tranzisaun seidauk bele halo rezumu finál ba avaliasaun, tanba sei hala’o iha nasionál hodi submete ba Primeiru Ministru.
“Komisaun hala’o nia servisu hahú iha loron 11 dezembru to’o ohin loron, servisu iha RAEOA ne’e ami konklui ona, ami sei fila-fali ba Dili, atu hato’o ba Primeiru Ministru bele hatene kona-bá kondisaun reál iha RAEOA,” Koordenadór Komisaun Tranzisaun, Sebastião José Luis dos Santos Pereira, ba jornalista sira iha Oé-Cusse.
“Bainhira submete ona, ikus mai atu haree fila-fali oinsá politikamente ba oin oinsá, ne’e ami sei entrega relatóriu ba Primeiru Ministru mak foti desizaun,” nia afirma.
Notísia relevante:Governu estabelese komisaun tranzisaun iha RAEOA
Koordenadór Komisaun Tranzisaun ne’e, hateten, relatóriu ne’ebé Komisaun Tranzisaun simu kabe ba Prezidente Autoridade ho estrutura tomak, no durante simu relatóriu sira-ne’e, seidauk deteta irregularidade ruma tanba parte Komisaun Tranzisaun seidauk halo rezumu finál ba avaliasaun relatóriu sira.
“Maibé ami foti, liuhosi odamatan ida de’it, fornese hosi Gabinete Prezidente Autoridade, dadus ami foti ona maibé ami fila ba Dili mak foin halo rezumu avaliasaun no rezumu ba relatóriu ne’ebé iha, iha erru ruma ka lae.
Tanba iha nível nasionál, Primeiru Ministru hein hela atu hato’o relatóriu sira-e’e, maibé Primeiru Ministru hala’o hela servisu ofisiál iha estranjeiru, bainhira fila mai iha iha semana ne’e, sei entrega relatóriu.
“Tanba ida-ne’e nia prosesu sei ba to’o nomeiasaun Prezidente Autoridade foun,” nia afirma.
Antes ne’e Prezidente Autoridade RAEOA sesante, Arsénio Paixão Bano, rekomenda ba ekipa tranzisaun, atu trata asuntu relatóriu Autoridade ho responsabilidade hodi hato’o ba Primeiru Ministru, tanba asuntu Estadu no labele públika ho livremente iha mídia sosiál.
Nune’e agradese ba ekipa tranzisaun bele kumpri despaisu Primeiru Ministru tanba tranzisaun ba Autoridade sesante importante nune’e bele prepara no kria kondisaun di’ak molok nomeia lideránsa foun ba RAEOA.
“Ha’u hanoin servisu la’o hanesan bai-bain, tranzisaun ba ha’u ne’e importante ba preparasaun sasán di’ak, ida foun mai troka ho di’ak, ne’e ba interese Oé-Cusse no Timor-Leste, ne’ebé hot-hotu hakmatek husik komisaun hala’o nia servisu,” nia katak.
Notísia relevante: Nomeasaun ba Autoridade RAEOA foun tarde, bele afeta ba saláriu funsionáriu sira
Entretantu, antes ne’e Primeiru Ministru (PM) Kay Rala Xanana Gusmão, liuhosi despaixu númeru 014/PM/VII/2023, ne’ebé formaliza iha loron 01 dezembru 2023, harii Komisaun Tranzisaun ba mandate Membru Autoridade RAEOA.
Iniasiativa ne’e mai hosi alterasaun lejizlativa ne’ebé prevee ona iha Lei númeru 18/2023, loron 30 novembru, ne’ebé automatikamente determina termu funsionáriu sira inklui Prezidente Autoridade RAEOA, Arsénio Paixão Bano.
Jornalista: Abílio Elo Nini
Editór: Evaristo Soares Martins
