iklan

JUSTISA, COVALIMA

Rejistu Notariadu Covalima suspende atividade durante loron rua ba falesimentu Ministru Justisa

Rejistu Notariadu Covalima suspende atividade durante loron rua ba falesimentu Ministru Justisa

Edifísiu Rejistu Notariadu Covalima. Imajen /Celestina Teles.

COVALIMA, 22 janeiru 2024 (TATOLI) – Servisu Munisipál Konservatóriu Rejistu Notariadu Covalima suspende provizioriamente atendimentu ba sidadaun sira ne’ebé trata sira-nia dokumentu hanesan Sertidaun RDTL, Rejistu Kriminál no Billeti Identidade (BI) tanba relasiona ho falesimentu Ministru Justisa, Amândio de Sá Benevides. Toleránsia pontu ne’e hahú iha loron 22 to’o 23 janeiru.

Diretór Munisipál Konservatóriu Rejistu Notariadu Covalima, António Sarmento, esplika Rejistu Notariadu simu despaixu husi Ministériu Justisa ne’ebé fó sai liuhusi Gabinete Fortalesimentu Insituisionál katak provizóriu sei lahalo atendimentu ba sidadaun-sira durante loron rua hodi partisipa prosesu fúnebre Ministru Justisa. Serimónia fúnebre  hala’o ohin iha semitériu públiku Becusse.

“Gabinete Vise-Ministru Fortalesimentu Insituisionál fó sai despaixu ho nia númeru 14/GVMFI/2024 ne’ebé asina husi Vise-Ministru Fortalesimentu, Paulo Remédios relasiona ho matebian Ministru Justisa hakotu iis hodi fó toleránsia pontu durante loron rua ba funsionáriu no ajente Ministériu Justisa Nasionál ho Munisipál hodi partisipa prosesu fúnebre”, dehan.

Nune’e, funsionáriu Rejistu Notariadu Covalima hahú fali halo atendimentu normál ba sidadaun  ne’ebé hakarak trata sira-nian dokumentu iha loron 24 janeiru.

Sidadaun Fernando Ramos dehan nia parte bá Rejistu Notariadu Covalima no rona informasaun husi seguransa sira katak atendimentu suspende loron rua.

Ministru Justisa, Amândio de Sá Benevides, hakotu nia iis, ho idade 59, iha Óspital Nasionál Guido Valadares (HNGV) iha loron 20 jeneiru hafoin hetan ataka kardíaku.

Matebian moris iha loron 06 fulan-jullu tinan 1964, iha munisípiu Ainaro, Amândio de Sá Benevides, koñesidu nu’udar advogadu, ne’ebé kontribui ona ho signifikativu ba dezenvolvimentu jurídiku no promove direitu umanu iha Timor-Leste.

Notísia relevante: Família sentre triste lakon Ministru Amândio Benevides

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!