COVALIMA, 23 janeiru 2024 (TATOLI) – Atividade ensinu-aprendizajen iha Eskola Bázika Sentrál (EBC, sigla portugés) Suai Loro la’o ona, maibé hasoru problema ba falta profesór ba dixiplina língua ingleza, istória no siénsia fízika.
EBC Suai Loro ho nia totál alunu 649 – feto 342 no mane 307 ne’e iha nia profesór 34, maibé ida moras no na’in-tolu asume kargu dirijente.
Xefe Gabinete Apoiu Tékniku, Fernanda da Costa, hatete eskola ne’e sei falta dosente ba dixiplina refere tanba iha eskola ne’e eziste de’it manorin na’in-tolu ba dixiplina tolu no ema ida labele hanorin sala-de-aula hitu hahú husi dadeer to’o lorokraik, nune’e presiza atu aumenta.
“Kona-ba problema ne’ebé eskola enfrenta maka halo ona jestaun ho rekursu ne’ebé iha no aguenta hanorin estudante hodi hein desizaun husi Ministériu Edukasaun”, Fernanda da Costa hatete.
Nia salienta katak ba dixiplina tolu ne’e, kada profesór bele hanorin estudante turma dadeer iha sala aula hitu, tanba sétimu anu iha turma A to’o C, oitavu iha A to’o B no nonu ano iha A to’o B ne’ebé kada sala aula akumula alunu 30 to’o 40-resin.
Iha sorin seluk, Xefe Departamentu Jestaun no Programa Edukasaun, Gregório Ferreira Afonso, relata dadus profesór ne’ebé hanorin iha eskola públika 59 hamutuk 1.101 la inklui manorin iha eskola privada.
Manorin 1.101 ne’e mai husi husi pré-eskolár 59, EBC 872, sekundária 79, tekniku vokasionál 78 no Eskola CAFE 13.
Notísia relasionada: EBC Suai Loro menus fasilidade
Jornalista: Celestina Teles
Editora: Maria Auxiliadora
