iklan

POLÍTIKA

Governu presiza regula kamioneta tula sasán tama hosi fronteira

Governu presiza regula kamioneta tula sasán tama hosi fronteira

Karreta sira tula sasan nesesidade bazika iha area Fronteira Batugade, Munisipiu Bobonaro atu mai Timor-Leste.Imajen/Agapito dos Santos.

DILI, 12 fevereiru 2024 (TATOLI)—Prezidente Komisaun C trata asuntu Finansa Públika iha Parlamentu Nasionál (PN), Deputada Cedelísia dos Santos Faria, husu Governu presiza regulariza kamioneta sira tula sasán tama hosi fronteira terrestre mai Timor-Leste.

Notísia Relevante: Komisaun C rekomenda pontu ualu iha fiskalizasaun ba Portu Baía Tibar

“Ami-nia relatóriu fiskalizasaun komisaun C distribui ona ba Deputadu sira, aproveita Vise Ministru ba asuntu Parlamentár iha ne’e, ami bainhira hala’o fiskalizasaun ba iha Portu Baía Tibar. Ami nota katak bazea ba karik dekretu-lei ou dekretu Governu ne’ebé aprova iha Governu liu-bá, fó impaktu ba reseita ka kontainer sira-ne’ebé tama hosi Surabaya (Indonézia), sira la mai direta ita-nia Portu Tibar maibé sira ba para tiha fali iha parte Indonézia, parte Atambua ou Atapupu, depois mak sira destaka fila-fali sasán sira-ne’e mai liu uza (tula) ho kamioneta, entaun impaktu ita halo tiha ita-nia portu di’ak envezde hatama reseita ba ita-nia nasaun,” nia hato’o liuhosi intervensaun iha reuniaun plenária PN, segunda ne’e.

Membru husi órgaun lejislativa ne’e husu Ministériu Transporte no Komunikasaun (MTK) atu bele haree fila-fali kestaun ne’e.

“Ita hatene, kamioneta sira-ne’e mai uza ita-nia estrada, ne’e mós livre la selu ita-nia Estrada. Ne’ebé husu ba IX Governu Konstitusionál atu haree ida-ne’e,” Deputada hosi bankada CNRT ne’e hateten.

Vise Ministru ba asuntu Parlamentár, Adérito Hugo da Costa, hateten rejista hela iha rodoviáriu nian no mós Ministériu Finansa haree hela oinsá fó solusaun ba kestaun ida-ne’e, dezde Portu Baía Tibar tama iha funsionamentu ne’e deteta hela tendénsiu hirak ne’e.

‘’Ita hotu hakarak autór hala’o atividade komérsiu hala’o importasaun mai iha Timor-Leste tenke liuhosi dalan úniku mak ida Portu Tibar liuliu transporte marítima. Se sira tendénsia kontinua halo hatun sasán iha portu Atambua nian mak lori tama, ne’e ita analiza hela para solusaun ba kestaun ne’e. Tanba, ita labele ho de’it medida ne’ebé frontál maibé tansá mak akontese situasaun ne’e, sira-nia ró lakohi tama iha ita-nia portu, nune’e hatun sasán maibé hatun iha fronteira no mai ho karreta. Governu hare hela ida-ne’e,” nia dehan.

Ministériu kompetente, nia dehan, liuhosi Ministériu Transporte Komunikasaun (MTK) foin dadaun asina memorandu entendimentu (MoU) ida iha Jakarta-Indonézia no Ministru Transporte Komunikasaun Indonézia nian hodi tama ba negosiasaun ba akordu sira konkretu.

Asuntu sira-ne’e, Timor-Leste bele rezolve iha nível negosiasaun bilaterál entre Timor-Leste ho Indonézia, tanba ida-ne’e liga ho jestaun fronteira, infraestrutura Indonézia nian ne’ebé besik iha territóriu Timor-Leste.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!