Top

Komisaun E husu reabilita fasilidade infraestrutura iha fatin turizmu

Estátua João Paulo II. Imajen/Dok.Antonio Gonçalves

DILI, 16 fevereiru 2024 (TATOLI)—Prezidente komisaun E trata asuntu Infraestrutura iha Parlamentu Nasionál (PN), Deputadu Marcos Xavier, husu Governu liuhosi ministériu kompetente atu reabilita fasilidade infraestrutura iha fatin turizmu sira.

Nia hateten, iha fatin turizmu sira balun ninia fasilidade aat la funsiona no hetan estragu nune’e presiza duni halo reabilitasaun.

“Kona-ba fatin turizmu sira-ne’ebé mak iha, ezemplu Cristo Rei, maibé agora iha IX Governu iha ona planu halo reabilitasaun fatin sira-ne’e ho mós fatin sira seluk. Hanesan iha fatin Estátua Papa João Paulo II iha tasi-Tolu ne’e, agora iha kompañia timoroan balun ne’ebé mak agora halo hela reabilitasaun ho mós estrada trosu ida husi estatua Nicolau Lobato Komoro ba to’o iha Tasi-Tolu iha ne’eba loké luan tan ona,” Prezidente Komisaun E ne’e hateten iha Parlamentu Nasionál, sesta ne’e.

Nia mós sujere ba parte ezekutivu atu identifika hare mós estrada ligasaun ba fatin turizmu sira iha territóriu hodi hadia nune’e fasilita turista lokál no internasionál ba vizita bainhira estrada di’ak.

Aleinde ne’e, nai dehan, Governu haree mós kria fasilidade iha fatin turizmu sira inklui konstrui jardin no infraestrutura ho fasilidade iha fatin turizmu sira.

Antes ne’e, Diretora Nasionál Dezenvolvimentu Turístika iha Ministériu Turizmu no Ambiente, Rosita Garcia, informa iha tinan ne’e halo ona planu reabilita Jardin Cristo Rei iha Fatucama ho João Paulo II Tasi-Tolu ho orsamentu rihun $100.

Hafoin reabilita jardin rua ne’e sei kontinua harii jardin munisípiu Lautem, postu Tutuala (Valu Sare, reabilita pouzada) ho praia Kaitehu-Liquiça no mos reabilita pauzada sira iha Liquiça, Manufahi, Maubisse no Lautém-Tutuala inklui edifísiu antigu portugés nian ho orsamentu hamutuk rihun $900.

Notísia Relevante: Governu reabilita, iha trimestre daruak, Jardim Cristo Rei no João Paulo II

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!