BOBONARO, 29 fevereiru 2024 (TATOLI)-Diretór Sekretaria Estadu Formasaun Profesionál no Empregu (SEFOPE), Munisípiu Bobonaro, Luís de Jesús Barreto, husu ba aplikante vaga online Austrália atu estuda maka’as lian Ingles atubele prepara-aan tuir teste eskrita ne’ebé sei realiza iha fulan-marsu 2024.
Diretór ne’e informa, tuir loloos teste ne’e sei realiza iha loron 16 to’o 17 marsu, maibé tanba fallansu tékniku SEFOPE nasionál altera fali ba 22 to’o 23 marsu tinan 2024.
Nia hato’o apelu ne’e tanba teste refere la’ós timoroan de’it mak fó, maibé sei iha mos ekipa hosi Austrália.
“Ha’u-nia mensajen ba aplikante sira atu tuir teste, favór ida ba buka kursu língua inglés atubele kompete iha teste ne’e , ita-nia joven sira labele hein de’it mak dehan ami atu ba tuir teste, ne’e labele, bainhira ita-nia naran sai ona, ita mós tenke prepara-aan,” nia informa ba jornalista sira iha Maliana, kinta ne’e.
Nia apela ba aplikante sira atu prepara saúde no mentál núne’e bele hetan rezultadu di’ak iha prosesu selesaun.
“Se lae ita pasa tiha iha eskrita ba ita hela fali iha entrevista ho saúde, ha’u husu ba joven sira labele kalan hadeer demais, fuma sigarru ne’e para tiha, hemu mos para, tenke haan di’ak no hemu di’ak, se lae ita ida esforsu hakarak ba servisu iha Austrália ne’e mak lakon,” nia fó hanoin.
Totál aplikante iha munisípiu Bobonaro hamutuk 4,679 sei tuir teste eskrita ne’ebé sei realiza iha salaun Jináziu Maliana.
Notísia relevante: SEFOPE finaliza ona vaga serbisu bá Austrália ho aplikante hamutuk 50.578
Jornalista: Sérgio da Cruz
Editór: Evaristo Soares Martins
