DILI, 03 marsu 2024 (TATOLI) –Prezidente Repúblika, José Ramos Horta, fila hikas mai Timor-Leste (TL), iha domingu ne’e, hafoin vizita Estadu ba rai-li’ur hanesan Estadu Unidu Arabe (EUA) ba asinatura adezaun Timor-Leste nia ba Organizasaun Mundiál Komérsiu (OMK) no reuniaun ho Xefe Estadu Laos nune’e mós enkontru bilaterál seluk hodi hametin lasu kooperasaun.
Kona-ba opiniaun públiku relasiona ho delegasaun ne’ebé boot, Xefe Estadu hateten, nia parte laiha koñesimentu ba delegasaun ne’ebé boot tebes iha nasaun ida no rekomenda atu husu ba Xefe Governu no Vise Primeiru-Ministru Asuntu Ekonómiku maka deside sira-nia delegasaun.
Hanesan órgaun ida husi Estadu ne’e, Prezidénsia Repúblika mós hetan konvite ba partisipasaun iha eventu internasionál sira.
“Prezidénsia Repúblika simu konvite no deside atu partisipa ka lae no normalmente iha pesoál to’o neen hodi akompaña ho kontrolu ne’ebé másimu ba billete aviaun, enkuantu akomodasaun nasaun konvidada maka responsabiliza hotu,” Ramos Horta hateten.
Entretantu, partisipasaun Xefe Estadu nian iha EUA tanba konvida hus Diretora-jerál OMK, Ngoji Okonjo-Iweala, no iha biban hanesan, atribui mós kondekorasaun ba diretora-jerál OMK ne’e ho Ordem Kolár Timor-Leste.
Notísia relevante:PR Horta kondekora Ngoji Okonjo-Iweala ho kolár ordem Timor-Leste
Alende ida ne’e, PR Horta vizita Laos nu’udar jestu ida hodi hametin relasaun diplomátika no hanesan mós atu aselera adezaun Timor-Leste nian ba ASEAN iha ne’ebé Laos nu’udar lideransa ba Organizasaun internasionál ne’e.
Notísia relevante:Horta hakarak promosaun interkámbiu entre joven – estudante TL no Laos
Jornalista: Joanico de Araújo
Editór: Rafael Ximenes de A. Belo
