PPN: Rejimentu fó dalan substituisaun temporáriu bele retoma fali kna’ar Deputadu

DILI, 05 marsu 2024 (TATOLI)—Prezidente Parlamentu Nasionál (PN), Maria Fernanda Lay, hateten rejimentu fó dalan ba Deputadu titulár halo ona substituisaun temporáriu to’o tempu ba fali PN hodi bele retoma fali ninia kna’ar nu’udar Deputadu.
Notísia Relevante: Kalohan: “Ha’u la’ós mai buka imunidade’’
“Loos, tanba rejimentu fó dalan bainhira Deputadu ne’e ba okupa pozisaun seluk hanesan mós prátika baibain iha substituisaun temporária. Kuandu nia rezigna aan mak subtituisaun definitiva, maibé hanesan titular, nia bele fila kuandu nia la rezigna aan,” Prezidente PN ne’e hateten ba jornalista sira iha PN, tersa ne’e.
Nune’e, rejimentu fó dalan ba Deputada PD, Rozenha Martins ne’ebé antes ne’e halo subtituisaun temporária ba Deputadu António da Conceição “Kalohan”, nu’udar Deputadu titulár nune’e bele retoma fali kna’ar hanesan Deputadu.
“Nia titular, dezde nia sansaun seidauk, nia sei iha rekursu, ita respeita. Ha’u fiar katak justisa mós la’o tuir regra ne’ebé iha. Ne’ebé, nia iha direitu atu retoma nia mandatu,” Prezidente PN hateten.
Líder másimu segundu órgaun soberania ne’e hateten, se nia iha prosesu ne’e klaru imunidade hasai bainhira nia hatán iha Tribunál, hanoin prosesu ne’e la’o dalabarak ona tanba nia la’ós foti imunidade totál, maibé parsiál bainhira presiza nia ba hatán, ida-ne’e demokrátiku tanba iha aspeitu ne’e iha ona prátika barak.
“Tribunál bele hateten nia sala, maibé desizaun finál ita hein nia rekursu ne’e hatán. Klaru se mantein, klaru ninia desizaun tenke foti, maibé ita hein, ha’u lakohi antesipa desizaun ne’e,”m nia dehan.
Antes ne’e, iha loron 12 fulan dezembru 2023, Rozenha Fatima de Oliveira Martins, substitui Deputadu Kalohan hanesan Deputada iha PN.
Subtituisaun ne’e tanba António da Conceição “ Kalohan” hetan nomeasaun hosi Prezidente Repúblika hodi asume pasta hanesan Embaxadór Extraordináriu no Plenipotensiáriu Repúblika Demokrática Timor-Leste ba Embaixadór Repúblika Indonézia, ne’ebé simu pose hosi Xefe Estadu iha 12 dezembru 2023.
Tuir karta aseitasaun substituisaun temporária, antes ne’e hosi Deputada Rozenha Fatima de Oliveira Martins, iha kandidatura numeru-sia tuir lista Tribunál Rekursu leitura akordaun 0023/2023-TR.
Bazea ba lei númeru 9/2017, 05 maiu, kona-ba eleisaun parlamentár kuarta-alterasaun ho lei numeru 6/2006, 28 dezembru, lei numeru-3 artigu-15, aseita atu subtitui Deputadu eleitu sesta-lejislatura, Antonio da Conceição “Kalohan”.
Enkuantu tuir lei existente ne’ebé fó dalan ba Deputadu António da Conceição atu retoma ninia pozisaun nu’udar Deputadu mak hanesan iha Rejimentu Parlamentu Nasionál (RPN) iha sesaun II Deputadu sira-nia podér no dever artigu 9. º (Poder) iha númeru 3 hateten atu garante regulár exersísiu ba nia mandatu, Deputadu nia poder inklui mós, ne’ebé iha alínea c), kona-ba halo rekerimentu.
Enkuantu substuisaun temporária previstu iha artigu 4 alínea a, 5 no 9 númeru 1 hosi lei númeru 05/2004, 05 maiu, no númeru 2/2006 Kona-ba Lei Eleitorál Parlamentu Nasionál no artigu 05 Rejimentu Parlamentu Nasionál (RPN).
Notísia Relevante: Jurista Sergio Quintas lamenta António Conceição retoma mandatu iha PN
Jornalista : Nelson de Sousa
Editór : Cancio Ximenes

