DILI, 22 marsu 2024 (TATOLI)–Diretór Nasionál Administrasaun Lojístika no Patrimóniu iha Ministériu Saúde (MS), Júlio dos Santos, husu ba diretór sira iha Servisu Saúde Munisipál atu enkaixa nesesidade servisu nian iha sira-nia planu asaun anuál.
Notísia Relevante: MS tenke fó atensaun eletrisidade mate difikulta parteira fó partu ba inan isin-rua
Nia hato’o kestaun ida-ne´e nakait ho preukupasaun kordenadora parteira maternidade postu administrativu Atsabe munispiu Ermera, Guida de Jesus Gonçalves, kona-ba eletrisidade mate kle´ur difikulta servisu atendimentu ba inan sira-ne’ebé atu partus/
“Atu dehan katak servisu munisipal sira hetan autoridade mai hosi fatin rua, ida mak servisu sentral no ida seluk husi autoridade munisípiu. Sira mós iha kompeténsia lubuk ida iha ne’ebá,”, Diretór Nasionál Administrasaun Lojístika no Patrimóniu iha Ministériu Saúde (MS), Júlio dos Santos, ba Agencia Tatoli, iha Caicoli, kinta ne´e.
Nia esplika, sasán sira hanesan lampu (ahi) no bee sira-ne´e, diretór sira bele uza sira-nia kompetensia atu buka solusaun, tanba situasaun sira-ne’e mos diretór sira bele responde.
Tuir nia, situasaun sira kuandu labele liu ona, entaun bele halo ida proposta ba iha servisu sentrál ka nasionál.
Nia esplika, diretór sira bele utiliza osan sira ba manutensaun fasilidade sira ba iha sentru saúde sira, maibé ida-ne’e depende sira jere osan sira-ne’e ba nesesidade urjente.
MS distribui kombustível ba servisu saúde munisipal
A;einde ne´e, nia dehan, MS asina akordu ho kompaña Aitula Fuel hodi bele distribui ona kombustível ba Servisu Saúde Munisípiu sira.
“Prosesu aprovizionamentu hotu ona. Agora iha ona manan-na´in ba mina no horisehik ita asina ona akordu ho kompaña, atu ohin bele lori mina ba servisu saúde munisipiu sira,” nia dehan.
Distribuisaun mina depende ba iha kapasidade lojistika empreza Aitula nian, ezemplu ohin lori ba Manufahi, entaun aban mak lori fali ba Lautem.
Kada munisipiu MS distribui 2.550 litros hodi servisu saúde munisipál bele utiliza durante fulan tolu, maibé kazu iha atividade barak saúde nian no kombustível hotu lalais, responsavel sira bele aprezenta proposta mai iha nasionál.
“Ita distribui 2.500 litru por munisipiu no ita nia kalkulasaun ba iha fulan tolu. Kuandu mina hotu antes fulan tolu, sira bele halo pedidu emerjensia mai ita,” nia esplika.
MS halo gastu ba kombustível ho totál orsamentu hamtuk $100.000 ba fulan tolu hodi distribui, depende ba iha folin mina iha merkadu.
Servisu Saúde munisipiu sira-ne’ebé aprezenta proposta kombustível mai iha nasionál mak hanesan Bobonaro, Dili, Emera no Manatuto, tanba fatin sira iha kazu dengue.
“Tanba sira halo gastu ba iha oin rua hanesan fomigasaun no transporte,” nia hateten.
Antes ne’e mos, diretór Servisu Saúde munisipiu Lautém, Anastácio de Jesus, lamenta katak sira laiha kombustível ba atividade saúde nian.
Notísia Relevante: Eletrisidade mate kleur difikulta profesional saúde fo partu ba inan isin-rua
Jornalista : Jesuína Xavier
Editór : Cancio Ximenes
