DILI, 27 Marsu 2024 (TATOLI)—Eskola Ensinu Sekundáriu Jerál (ESJ) 05 de Maiu iha Becora to’o agora seidauk hetan transferénsia kontributu hosi Ministériu Edukasaun (ME) hodi halo imprensaun ba matéria ezame primeiru períodu, ne’ebé sei hala’o iha loron 01 to’o 06 Abríl 2024.
“Ami husu ba Ministériu Edukasaun atu atribui sedu nune’e ami bele halo atividade ligadu ho imprensaun matéria ezame nian ba primeiru períodu ba estudante sira, tanba ami eskola públika nia difikuldade boot mak osan. Tanba ne’e, ami hakarak husu ba Na’i-ulun sira iha leten atu atribui sedu. Bainhira tarde mak sei prejudika ba ita-nia prosesu imprime,” Diretór Eskola ESJ 05 de Maiu, Adelino Nicolau, informa ba Agência Tatoli, iha ninia knaar fatin, Becora, kuarta ne’e.
Antes ne’e, Jerente eskola no Diretór Servisu Edukasaun munisípiu Dili halo reuniaun no deside empreza ne’ebé sei halo imprensaun matéria ezame.
“Ita impreme iha empreza Domin Matebian. Tanba ne’e, hein Ministériu Edukasaun atribui osan konsensaun eskolár maibé bainhira tarde devolve fali. Daudaun ne’e ita preparadu atu ezame primeiru períodu, maski iha difikuldade maibé ami sempre esforsu no buka meiu hodi estudante bele ezame ho susesu no di’ak liu,” nia akresenta.
Notísia relevante : ME hapara profesór kontratadu difikulta elaborasaun matéria ba ezame períodu dahuluk
Tuir Diretór eskola, kondisaun ne’e la’ós foin akontese maibé akontese ona iha tinan antes ne’e hodi prejudika atividade eskola.
“Uluk liu ne’e estudante nia inan-aman kontribui osan $0,50 hodi ita uza ba atividade eskola nian inklui ba impreme matéria ezame, maibé Ministériu Edukasaun liuhosi Diretór Eskola sira bandu eskola atu husu kontribuisaun, tanba ne’e paradu, ita hasoru difikuldade tebes ba osan. Eskola públika sira hotu garante de’it ba Governu. Tanba ne’e, prosesu atribuisaun orsamentu konsensaun eskolár ne’e sedu, di’ak liu, nune’e bele fasilita atividade eskola,” nia akresenta.
Eskola ESJ 05 de Maiu iha Becora daudaun ne’e akumula estudante 1.456 no saladeaula 14.
Iha fatin ketak, Diretór Eskola ESJ 04 Setembru UNAMET, Balide, Martinho de Menezes, dehan, parte eskola preparadu atu realiza ezame primeiru períodu iha tinan ne’e.
“Iha eskola ne’e sempre iha difikuldade oin-oin maibé ami nafatin esforsu atu labarik sira bele halo ezame. Hanesan Diretór buka meiu oin-oin atubele rezolve problema sira-ne’ebé ligadu ho osan,” Diretór tenik.
Nune’e mós, Diretór Eskola Ensinu Báziku Sentrál (EBC, sigla portugés) 10 Dezembru iha Comoro, Nicolau Amaral, hateten, parte eskola prontu no laiha difikuldade ligadu ho ezame primeiru períudu.
“Ita-nia preparasaun tama ona ba finál no ita fó tempu ba estudante sira hodi deskansa, nune’e hein ezame. Ita laiha dikuldade no matéria mós kompleta hotu ona, hein estabelese de’it ona. Totál estudante iha eskola ne’e hamutuk 234,” nia informa.
Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, hateten, ekipa ministériu ne’ebé sei akompaña husi eskola sei tun ba terrenu.
“Ami atu haree no observa katak eskola sira ne’ebé virál iha rede sosiál, dehan ezame laiha no eskola balun taka, ida-ne’e mak presiza observa no buka hatene. Tanba ezame primeiru trimestre ne’e mak ita la konsege la’o ho di’ak ne’e problema boot,” nia tenik.
Governante ne’e reforsa, presiza koopera malu no bainhira profesór sira ne’ebé ulun to’os tenke muda ka halo transferénsia.
“Bainhira nia lakohi hasai haruka fali bá eskola seluk. Nune’e, superintendente no diretór ne’e atu ba rezolve problema la’ós ba sei estuda lai, bá servbsu no foti desizaun kedas labele ba mak sei estuda tan. Foti desizaun ne’e la’ós atu estraga ema maibé foti desizaun atu hadi’a,” nia salienta.
Jornalista : Osória Marques
Editora : Julia Chatarina
