iklan

POLÍTIKA

PN espresa kompromisu polítiku tama ASEAN ba Sekjer Kao Kim Hourn

PN espresa kompromisu polítiku tama ASEAN ba Sekjer Kao Kim Hourn

Prezidente Parlamentu Nasionál, Maria Fernanda Lay, akompaña husi estrutura meza no líder bankada Parlamentár, tersa ne’e, simu vizita kortezia husi Sekretáriu Jerál (Sekjer) ASEAN, Kao Kim Hourn, ho delegasaun iha uma fukun Parlamentu Nasionál, tersa (02 abríl 2024) ne´e. Imajen/Tatoli.

DILI, 02 abríl  2024 (TATOLI)—Prezidente Parlamentu Nasionál, Maria Fernanda Lay, akompaña husi estrutura meza no líder bankada Parlamentár, tersa ne’e, simu vizita kortezia husi Sekretáriu Jerál (Sekjer) ASEAN, Kao Kim Hourn, ho delegasaun iha uma fukun Parlamentu Nasionál.

Notísia Relevante: PN kria komisaun eventuál akompaña prosesu adezaun TL ba ASEAN

Prezidente PN, Maria Fernanda Lay, hateten vizita kortezia husi Sekretáriu Jerál ASEAN nian mai PN, liuliu hodi haree kompromisu polítika husi Deputadu no bankada sira, liga ho Timor-Leste nia adezaun ba ASEAN iha tinan oin.

Sekretáriu Jerál ASEAN, Kao Kim Hourn,, hakarak mai haree Timor-Leste nia preparativu, inklui mós aprova tratadu sira-ne’ebé TL iha tratadu 66 ne’ebé prontu ona atu lori mai Parlamentu Nasionál.

“Sekretáriu Jerál ASEAN mai haree ita-nia preparativu sira-ne’e hotu, ita iha seriedade duni ka lae. Ami hato’o katak, vizita Sekretáriu Jerál, ita espresa komitmentu polítiku atu tama ba ASEAN. Tanba, ita fiar sai membru ASEAN ninian hamutuk ho nasaun sira seluk iha ASEAN sei lori benefísiu mai ita-nia povu no liuliu kria kampu traballu ba joven sira iha futuru,” Prezidente PN, Maria Fernanda Lay, hateten ba jornalista sira hafoin ramata enkontru iha PN.

Durante sorumutu, nia dehan, Sekretáriu Jerál hato’o katak servisu la fásil konserteza iha enkontru lubun ida mak TL tenke partisipa, nune’e mós preparativu ho lei saida mak PN tenke prepara hodi bele aselera sai membru plenu iha tinan oin.

PPN ne’e espera, Governu bele lori ona tratadu sira mai órgaun lejislativu ne’e hodi bele diskute no aprova.

“Espera Governu mós haruka lalais mai, no partisipasaun husi membru ASEAN nian, ita bele halo servisu di’ak-liu hanesan team member iha ASEAN,” nia hateten.

Sekretáriu Jerál ASEAN, Kao Kim Hourn, sente priveléjiu hamutuk ho delegasaun hasoru Prezidente Parlamentu Nasionál.

“Ha´u foin hasoru Prezidente PN, ida-ne’e hanesan priveléjiu boot ida ba ha’u no membru delegasaun husi sekretariadu ASEAN hodi hasoru Prezidente PN. Ami troka hanoin partikularmente kona-ba kooperasaun hodi apoiu TL nia adezaun ba ASEAN. Klaru katak, ami diskute kona-ba saida mak halo ona nu’udar Timor-Leste nia preparasaun. Pastu tuir mai mak ita hakarak Timor-Leste nia adezaun akontese sedu di’ak-liu duké tarde,” nia dehan.

Sekretáriu Jerál ne’e hakarak enfaze katak, papel PN importante tebes partikularmente iha preparasaun finál ba membru plenu ASEAN mak hodi n ratifika tratadu oioin ASEAN nian, akordu no seluk tan tanba hanesan membru ASEAN, membru hotu iha obrigasaun hodi ratifika tratadu sira.

“Ami mós diskute kona-ba papel ASEAN Inter-Parliamentary Assembly, tanba ida-ne’e mós instituisaun ida husi ASEAN ne’e mak importante ba Parlamentu Timor-Leste. Klaru katak ha’u haree ona kompromisu husi PN hodi servisu iha mekanizmu sira kona-ba ratifikasaun tratadu sira ASEAN nian. Ami sei kontinua servisu hamutuk hodi fó apoiu ba Timor-Leste nia adezaun ba ASEAN,” nia dehan.

Antes ne´e, iha 12 fevereiru 2024, PN liuhusi reuniaun plenária aprova projetu rezolusaun Parlamentu Nasionál númeru 30/VI(1a) Kria Komisaun Eventuál Akompañamentu Prosesu Adezaun ba Asosiasaun Nasaun Sudeste Asiátiku (ASEAN) ho rezultadu votasaun afavór 56, kontra no abstensaun 0.

“Nune’e pasa. Ne’ebé husu bankada parlamentár indika nia membru hodi bele forma meza hodi ita hato’o ba Governu no bainhira Sekretária ASEAN mai ita mós prepara ona novidade di’ak ba Parlamentu hotu-hotu katak, Timor-Leste espesífiku, ita iha preokupasaun ida ne’e,” Prezidente Parlamentu Nasionál, Maria Fernada Lay, hateten iha sala plenária PN.

Projetu rezolusaun ba kriasaun komisaun eventuál ne’e rekoñese importánsia no potensiál benefísiu adezaun Timor-Leste (TL) ba ASEAN.

Konsidera númeru inisiativa lejislativa no instrumentu internasionál husi kompeténsia PN nian ne’ebé nesesáriu atu aprova iha ámbitu prosesu adezaun ba ASEAN, nu’udar nesesidade kumpre prosedimentu prazu previstu iha roteiru.

Komisaun eventuál ne’e estabelese mekanizmu espesífiku hodi garante partisipasaun ativa no efikás PN iha ámbitu prosesu adezaun.

Kompete ba komisaun eventuál ne’e mak akompaña atividade Governu iha ámbitu prosesu adezaun TL ba ASEAN no elabora, submete apresiasaun iha plenária PN, relatóriu, paresér no projetu-lei ou rezolusaun ne’ebé konsidera pertinente ba prosesu adezaun, no promove koordenasaun entre PN ho instituisaun nasionál ne’ebé envolve iha prosesu adezaun TL ba ASEAN.

Mandatu komisaun eventuál funsiona durante períodu lejislatura ou termina iha data ne’ebé konklui ona prosesu adezaun TL ba ASEAN.

Kompozisaun komisaun eventuál kompostu husi Deputadu na’in-ualu (8), ne´ebé indika husi bankada parlamentár sira, hanesan CNRT iha na’in-tolu (3), FRETILIN na’in-rua (2), PD iha na´in-ida (1), KHUNTO iha na´in-ida (1) no PLP iha na´in-ida (1).

Meza komisaun eventuál nian kompostu husi prezidente ida (1), vise prezidente ida (1) no sekretáriu mós iha ema na´in-ida (1).

Komisaun eventuál ne’e aprezenta husi proponente Deputadu CNRT, Patrocínio dos Reis Fernandes, Deputadu FRETILIN, Aniceto Longuinhos Guterres Lopes, Deputadu PLP, Helder Freitas ‘Kamarudi’ no Deputadu PD, Manuel Hernique Noronha.

Notísia Relevante: Sekretáriu Jerál ASEAN hasoru PM Xanana atualiza preparasaun sai membru plenu

Jornalista : Nelson de Sousa

Editór         : Cancio Ximenes

iklan
iklan

Leave a Reply

iklan
error: Content is protected !!