iklan

POLÍTIKA

Komisaun B husu investiga membru PCIC husu osan ba fujitivu nia oan

Komisaun B husu investiga membru PCIC husu osan ba fujitivu nia oan

Logotipu PCIC. Imajen Tatoli/Egas Cristovão

DILI, 11 abríl 2024 (TATOLI)–Deputadu membru komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), Natalino dos Santos, husu ba instituisaun Polísia Sientífika Investigasaun Kriminál (PCIC,siglá portugés) atu halo investigasaun sériu ba membru PCIC ida-ne’ebé deskonfia husu osan ba fujitivu ka rekluzu filipinu, Arnalo Jr, nia oan.

Notísia Relevante: PCIC suspende membru tanba suspeita husu osan ba oan hosi fujitivu iha estabelesimentu prizionál

“Rekomenda ba instituisaun PCIC toma atensaun sériu ba asuntu ne’e, no tenke halo duni investigasaun ba kazu ne’e, no instituisaun ne’ebé kompetente bele  halo prosesu ba aktu kriminál ka aktu iresponsabilidade ba ema ne’ebé komete tenke responsabiliza ninia aktu,’’Nia hateten ba jornalista sira iha uma fukun PN, kinta ne’e.

Nia dehan, husi voice ka lian ne’ebé sirkula virál iha mídia sosiál ne’e sente ba ne’e presiza iha duni atensaun bá prosesu ne’e, maibé se nune’e beibeik ne´e triste tebe-tebes.

Deputadu membru komisaun B ne’e fiar katak iha instituisaun PCIC rasik foti ona medida no desizaun balun administrativamente hodi suspende membru PCIC ida-ne’e no depois mal prosesa.

Se kazu ne’e iha ona keixa husi vítima, entaun ida-ne´e hanesan krime semi-públiku, nune’e autór judisiáriu nia kna’ar halo prosesu tuir prosedimentu legál ne’ebé iha.

“Maibé ita labele dehan uluk nia halo kazu ne’e, tanba nia sala ona, lae. Ita tenke kaer nafatin ba prezunsaun inosénsia, tanba ema ida seidauk julgamentu iha Tribunál no seidauk iha desizaun tránzitu-julgadu ne’e, nia seidauk kulpadu,” nia hateten.

Tanba ita rona de’it ema nia lian ka voice iha  informasaun ne’ebé espalla iha mídia sosiál, la haree ema ne’e nia oin no la hatene naran, tanba agora ne’e telefone modernu bele muda ema nia lian no muda ema nia oin, nune’e presiza investigasaun klean.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!