Eskola Bázika no Sekundária Katólika Padiae falta rekursu atu hanorin
OÉ-CUSSE, 22 Abríl 2024 (TATOLI) – Eskola Bázika Sentrál (EBC, sigla portugés) no Sekundária Nossa Senhora de Fátima Padiae, iha Rejiaun Administrativa Espesiál Oé-Cusse Ambeno (RAEOA), laiha profesór sufisiente atu hanorin alunu sira.
Eskola Bázika ho nia estudanta hamutuk 300 no Sekundária iha 90 ne’e iha de’it profesór permanente na’in-neen mak hala’o atividade prosesu ensinu-aprendizajen.
“Ami-nia profesór menus tebes. Iha EBC na’in-neen de’it, ba Sekundária seidauk iha to’o agora. Ami husu atu apoia netik ami”, Diretór Eskola Katólika Padiae, Pe. Carlos de Deus, hateten iha ámbitu vizita ofisiál Sekretáriu Estadu Ensinu Sekundáriu Jerál no Ensinu Tékniku Vokasionál iha Oé-Cusse.
Notísia relevante:Dom Virgílio Cardeal inaugura Eskola Sekundáriu Katólika Padiae Oé-Cusse
Saserdote ne’e mós husu ba Ministériu Edukasaun atu tau-matan mós ba profesór sira-ne’ebé destaka iha eskola katólika katak bainhira iha formasaun ruma bele fó oportunidade mós ba sira no labele hili de’it manorin husi eskola públika sira.
“Hili mós iha eskola privada sira atu kapasita sira iha formasaun sira, tanba sira mós hanorin povu ne’e nia oan. Tinan barak profesór sira iha eskola privada, liuliu iha EBC Padiae seidauk hetan oportunidade atu bá tuir formasaun sira, tantu mai husi nasionál komu rejionál”, nia sujere.
Diretór eskola ne’e relembra katak iha vizita Ministra Edukasaun, Dulce de Jesus, foin lalais iha Oé-Cusse, manorin sira mós husu ba governante ne’e tanba saida mak la envolve sira iha formasaun sita.
Hatán ba kestaun ne’e, Sekretária Rejionál ba Asuntu Edukasaun no Solidariedade Sosiál, Inácia Tamele, dehan problema ne’e la’ós akontese de’it iha eskola privada sira, maibé akontese mós ba eskola públika sira seluk.
“Ami foin serbisu atu tama ba fulan tolu. Ami-nia prezensa iha ne’e hakarak halo mudansa atu labele iha diskriminasaun entre eskola públika no privada sira. Tanba ne’e, ami jere de’it orsamentu ne’ebé propoin ona hosi autoridade sesante sira atu envolve eskola katolika. Iha 2025, ami sei envolve eskola privada sira no ha’u garante tanba durante ne’e eskola públika sira mós enfenta problema hanesan”, nia promete.
Notísia relevante:Ministériu Edukasaun apoia mobiliáriu ba eskola tolu iha Oé-Cusse
Jornalista: Abílio Elo Nini
Editór: Maria Auxiliadora
