DILI, 29 abríl 2024 (TATOLI)-Ministru Justisa, Sergio Hornai, hateten, MJ triste bainhira rona informasaun katak Majistradu Judisiáriu na’in rua husu hodi hasees aan husi setór justisa.
“Ha’u mós simu ona infomasaun katak iha ita-nia Juíz na’in rua mak husu nia ezonerasaun por vontade rasik no Konsellu halo ona ezonerasaun ba sira. Ida-ne’e kompeténsia órgaun idak-idak nian no ida-ne’e direitu prerogativu ema idak- idak nian tanba por vontade ita labele viola ema nia direitu. O que certo ba ha’u, triste uituan mak ne’e, ho ezonerasaun Majistradu Judisiáriu na’in rua ne’e fó impaktu ba rekursu majistradu judisiariu iha setór justisa,” Sergio Hornai hateten ba Jornalista sira hafoin reuniaun Konsellu Konsultivu Setór Justisa, iha salaun Ministériu Justisa Colmera, segunda ne’e.
Governante ne’e hateten, hanesan sidadaun kuandu nia hato’o pedidu ho vontade rasik otomatikamente hanesan Konsellu tenke aprova labele la aprova, kuandu la aprova ida-ne’e parte ida halo violasaun ba ema nia direitu.
Autoridade ne’e hatutan, ba oin, Governu sei la taka-matan hodi kontinua dezenvolve setór justisa liuliu aumentu rekursu umanu iha majistradu judisiáriu.
“Tinan oin Ministru Justisa kontinua aposta ba rekursu umanu liuliu fortalese Sentru Formasaun Jurídiku Judisiariu hodi kontinua loke formasaun Majistradu Judisiáriu, Majistradu Ministériu Públiku no Defensoria Públika,” nia adianta.
Iha fatin hanesan, Diretora Sentru Formasaun Juridiku Judisiária (CFJJ, sigla portugés), Marcelina Tilman da Silva, hateten, formandu Juíz nain-13 mak oras ne’e daudaun hala’o hela sira-nia prátika iha Tribunál Judisiál Primeira Instánsia.
“Tinan kotuk ita halo abertura ba sétimu kursu formasaun ba majistradu Juíz ho vaga ba ema na’in-24 maibé agora daudaun formadu sira ne’ebé pasa ba iha fase prátika majistradu judisiáriu nian ne’e só iha ema na’in-13 no husi sira na’in-13 agora daudaun halo hela sira-nia prátika iha Tribunál Primeira Instánsia Dili,” nia informa.
Diretora CFJ ne’e dehan, formadu majistradu Juiz nain-13 halo sira nian prátika iha Tribunál Judisiál Primeira Instánsia Dili durante fulan neen hahú husi janeiru to’o juñu 2024.
“Sira halo sira-nia prátika durante fulan-neen mak Juíz sira husi Tribunál Primeira Instánsia Dili avalia katak sira hotu-hotu di’ak entaun sira sei pasa hotu ba Juíz estajiáriu, karik balun mak la pasa tanba bazea ba avaliasaun Juíz sira iha Tribunál Judisiál Primeira Instánsia nia haree entaun husi númeru-13 sei iha mudansa,” nia dehan.
Notísia relevante:Abertura formasaun advogadu, MJ husu seriedade no disiplina
Marcelina Tilman, hateten, ba majistradu judisiariu ne’ebé mak pasa ba faze estájiu, entaun majistradu sira sei halo sira-nia estajiu durante tinan-ida fulan iha Tribunál Judisiál Primeiru Instánsia sira Dili, Suai Oe-cuse no Baucau.
“Kuandu sira-nia avaliasaun di’ak sira bele ba iha Juíz karreira. Entaun, ne’e ita agradese bo’ot tanba ho ida ne’e sira hahú halo funsaun hanesan Juíz iha Tribunál Judisiál Primeiru Instánsia sira. Maibé, selesaun ba ida-ne’e la fasil tanba sei liu faze barak. Kuandu sira ne’e liu hotu ba Juíz karreira entaun ne’e grasa bo’ot ba ita tanba ho ida-ne’e bele reforsa ita-nia rekursu majistradu sira liuliu Juíz sira hodi haforsa servisu Tribunál nian,” nia dehan
“Tinan oin ita sei kontinua loke kursu formasaun ba Majistradu Judisiáriu, Majitradu Ministériu Públiku no Defensoria Públika hodi reforsa servisu setór justisa,” nia konklui.
Notísia relevante:Juiz STJ na’in haat no auditór tuir kursu espesializada iha sentru judisiáriu Portugal
Jornalista: Natalino Costa
Editór: Rafael Ximenes de A. Belo
