DILI, 02 maiu 2024 (TATOLI)—Eskola Bázika Sentrál (EBC, sigla portugés) Farol daudaun ne’e seidauk hetan transferénsia osan konsensaun eskolár hodi uza fasilita atividade no nesesidade eskola.
“Ita hakarak alarma ba Ministériu Edukasaun (ME) kona-ba ita-nia konsensaun eskolár tanba to’o agora ita seidauk simu, ita hakarak atu devolve fali imprensaun ne’ebé ajuda ita imprime ona, kleur ona, se bele prosesa lalais,” Diretora EBC Farol, Filomena Freitas, informa ba Agência Tatoli, iha ninia knaar fatin, Farol, kinta ne’e.
Iha sorin seluk, Adjuntu Diretór Eskola Ensinu Sekundáriu Jerál (ESJ) 04 Setembru UNAMET Balide, Alexandre da Costa, husu ME atu tau atensaun no aselera prosesu, tanba bainhira tarde, bele difikulta atividade eskola.
“Até a data konsensaun eskolár seidauk iha, tarde hodi difikulta ami-nia atividade eskola ne’ebé apoiu ba finansiamentu. Tanba ne’e, parte edukasaun atu haree ida-ne’e, ita-nia atividade hotu-hotu hein tebes konsensaun eskolár,” nia akresenta.
Notísia relevante : Eskola 70% mak hetan ona fundu konsesaun eskolár
Tuir haktuir, antes ne’e, Eskola ESJ 04 Setembru UNAMET Balide, deve hela empreza ne’ebé imprime materiál ezame primeiru períodu, nune’e presiza devolve fali.
Totál estudante iha Eskola ESJ 04 Setembru UNAMET Balide hamutuk 2.982, ne’ebé konsideradu hanesan númeru boot, tanba ne’e presiza iha kondisaun nune’e bele reforsa atividade eskola inklui sosa ekipamentu tanba estudante sira besik ona ezame períodu daruak.
Hatán ba kestaun ne’e, Diretór Nasionál Ensinu Sekundáriu Jerál, Benjamin Fernandes, husu ba Jerente Eskola ESJ, Eskola Ensinu Sekundáriu Tékniku Vokasionál (TEKVOK) no eskola privada sira atu aselara trata dokumentu ba konsensaun eskolár.
“Ha’u husu eskola sira atu aselera trata dokumentu, nune’e bele atribui konsensaun eskolár. Eskola Sekundáriu Jerál no Tékniku Vokasionál sei presiza loke konta bankária, ba kada eskola iha territóriu. Uluk sira iha konta bankária, entaun ami sei trata konta bankária foun no entrega ba foin atribui orsamentu ne’e,” Diretór dehan.
Jornalista : Osória Marques
Editora : Julia Chatarina
