DILI, 14 maiu 2024 (TATOLI)—Reprezentante povu iha uma-fukun Parlamentu Nasionál (PN) liuhusi Deputadu CNRT, Anacleto Freitas, husu ba Ministériu Asuntu Kombatente Libertasaun Nasionál (MAKLN) atu tau atensaun ba konstrusaun jardin eroi iha postu administrativu Viqueque Vila.
Notísia Relevante: Restu mortál kuaze rihun-10 iha ossoáriu munisipál seidauk haloot
“Konstrusaun jardin eroi iha postu administrativu Viqueque Vila, suku Uma-Uain Kraik ho rai ektare 16, jardin eroi ne’e sei uza hodi tau haloot restu mortál sira-ne’ebé agora daudaun sei tau hela iha uma mahon iha postu administrativu Uatulari, maibé haree ba obra fíziku konstrusaun jardin nian hahú tinan 2021 to’o agora seidauk finaliza no paradu hele. Ho nune’e, husu ba ministériu relevante hodi tau atensaun,” Deputadu Anacleto Freitas hateten iha Parlamentu Nasionál.
Antes ne’e, Deputadu Adolfo Martins, mós levanta kestaun kona-ba restu mortál iha munisípiu Ermera ne’ebé rekolla iha tinan 2015, maibé to’o agora restu mortál sira-ne’e hotu seidauk haloot kuaze besik 600 tau iha monumentu kiik ida iha ne’eba, no kaisaun sira-ne’e hada hanesan sasán ita ba loza haree ema faan sasán ne´e.
Aleinde ne´e, nia hateten iha tinan hirak ba kotuk, Governu halo tiha ona monumentu foun ida iha munisípiu Ermera, postu Railaco, iha suku Fatukero.
“Monumentu ne’e moru haleu tiha hotu ona no iha portaun, maibé monumentu ne’e agora abandona duut mak moris iha laran boot liu tiha fali moru, laiha kontinuasaun atu lori ita-nia restu moratál hodi haloot iha ne’eba ho dignu. Nune’e husu MAKLN atu tau atensaun ba kestaun ne´e,” nia dehan.
Vise Ministru ba asuntu Parlamentár, Adérito Hugo da Costa, rejista Deputadu sira-nian preokupasaun ne´e no sei enkamiña ba ministériu tutela hodi fó atensaun.
Jornalista : Nelson de Sousa
Editór : Cancio Ximenes
