POLÍTIKA

KFP presiza tau atensaun ba funsionáriu ajente ho estatutu kontratadu

KFP presiza tau atensaun ba funsionáriu ajente ho estatutu kontratadu

DILI, 03 juñu 2024 (TATOLI)—Membru Parlamentu Nasionál (PN) liuhusi Deputadu bankada CNRT, Virgílio Pereira, husu Komisaun Funsaun Públika (KFP) atu tau atensaun ba funsionáriu ajente iha administrasaun públika ne’ebé presta serbisu tinan barak ona ho de’it estatutu kontratadu.

Notísia Relevante: KFP sei halo diagnóstiku ba liña ministériál

“Funsionáriu ne’ebé kuaze tinan naruk sira-nia estatutu ne’e sai hanesan ajente, dalaruma ita iha Parlamentu ida-ne’e, Governu ida sa’e no Governu ida tun sempre troka, sira sempre sai vítima. Tanba ne’e, hakarak bolu atensaun ba Prezidente Komisaun Funsaun Públika (KFP) atu bele haree took kestaun ne’e. Ba futuru pelumenus oinsá bele koloka sira, pelumenus halo ona rekrutamentu hodi sira-ne’ebé estatutu durante ne’e sai ajente hela de’it bele mós hetan direitu hanesan funsionáriu permanente,” nia hato’o liuhusi reuniaun plenária PN, segunda ne’e.

Ho nune’e, nia dehan, funsionáriu ajenre sira-ne’e mós sente seguru bainhira iha Governu ida tun no Governu ida troka, hodi sira sente sira-nia moris ne’e ladún iha tendénsiaka  ladún di’ak ba sira.

Deputadu CNRT, Patrocínio dos Reis Fernandes, sekunda  mós kona-ba estatutu funsionáriu ajente ka kontratadu barak tebe-tebes ne’ebé mak funsionáriu kontratadu sira balun to’o tinan 10 no 12 nafatin no sira-nia prestasaun serbisu di’ak tebe-tebes, até balun to’o Governu uza hodi fó kargu xefia ba sira maibé ba sira-nia estatutu nafatin hanesan ajente.

“Ha’u hanoin, Prezidente Komisaun Funsaun Públika (KFP) bele haree took prosesu ruma, oinsá karik iha polítika ruma bele konverte sira ba funsionáriu permanente karik liuhusi prosesu saida. Maibé, importante tenke tau matan no atensaun ba sira, ne’e para enkoraja sira bele sira ninia prestasaun serbisu ne’e sai di’ak liután,” nia dehan.

Vise Ministru ba asuntu Parlamentár, Adérito Hugo da Costa, rejista Deputadu sira-nia preokupasaun sira-ne’e no envida ba entidade tutela.

Notísia Relevante: Komisaun A sei fó prioridade diskute lei reforma obrigatóriu ba FP

Jornalista : Nelson de Sousa

Editór         : Cancio Ximenes  

 

iklan
iklan

Leave a Reply

iklan
error: Content is protected !!