NASIONÁL, SAÚDE

UNTL no ministériu relevante diskute moras raiva hodi foti asaun apropriadu

UNTL no ministériu relevante diskute moras raiva hodi foti asaun apropriadu

Entidade relevante sira hasai fotografia hamutuk hafoin partisipa semináriu kona-ba moras raiva iha Timor-Leste, iha salaun CNE, Caicoli, kuarta (05/06/2024). Imajen Tatoli/Osória Marques

DILI, 05 juñu 2024 (TATOLI)–Universidade Nasionál Timor-Lorosa’e (UNTL), kuarta ne’e, realiza semináriu ne’ebé envolve Ministériu Edukasaun (ME), Ministériu Agrikultura no Peska (MAP) no Ministériu Saúde (MS) hodi halo diskusaun kona-ba moras raiva iha Timor-Leste nune’e bele foti asaun apropriadu.

“Importante tebes atu ita halo dezeñu estratéjiku hodi responde ida-ne’ebé mak efisiente hodi hasoru asuntu ida-ne’e. Hanesan Ministériu Saúde triste tanba ita iha kazu foun rabies (raiva) ida, ne’ebé tempu naruk ita livre husi moras ida-ne’e, fó nia implikasaun kuandu ita temi dehan Timor mós tama ona kategoria moras infesaun rabies ho buat sira hanesan ne’e ladún fó impaktu pozitivu ba nasaun no sosiedade,” Vise-Ministru Saúde, Flávio Brandão, hateten, durante halo diskursu, iha salaun Komisaun Nasionál Eleisaun (CNE, sigla portugés), Caicoli.

Tanba ne’e, realiza semináriu ne’ebé envolve akademista no entidade relevante husi ministériu sira inklui parseiru hodi kontribui hanoin ruma.

“Ita hotu fiar katak semináriu ohin bele fahe esperiénsia no evidénsia ba Governu hodi haforsa Governu atubele halo asaun ida-ne’ebé mais apropriadu,” nia akresenta.

Notísia relevante : Asu pozitivu Raiva tata labarik ida iha Holsa

Biban ne’e, governante hato’o apresiasaun ba UNTL tanba sensível duni ho problema nasionál ne’ebé sai preokupasaun iha sosiedade nia le’et.

“Ita foin hasoru moras rabies iha ita-nia rain, maibé foti kedas tópiku ida ko’alia kona-ba polítika no implikasaun, ha’u seidauk haree polítika ne’e bainhira implementa no nia implikasaun sira,” Vise-Ministru tenik.

Reitór UNTL, João Martins, informa, objetivu husi semináriu atu hatene moras ne’e nia lala’ok.

“Iha marsu 2024, ita hetan primeiru kazu raiva ne’ebé ita-nia inan ida mak sai vítima. Maibé tuir informasaun kazu ne’e akontese iha dezembru no lori fulan-tolu mak hetan nia impaktu no ikus mai lakon vida. Entaun, ba ami komunidade akadémika importante tebes hodi halo diskusaun hodi hatene di’ak moras raiva ne’e nia sintoma,” Reitór reforsa.

Nia konsidera, liuhusi kazu ne’ebé akontese, bele loke hanoin no dada parte hotu atu buka maneira hodi solusiona, tanba ne’e tenke serbisu hamutuk ho nasaun viziñu Indonézia, liu-liu iha parte sira husi Nusa Tenggara Timur (NTT) hodi halo prevensaun.

“Maibé iha rai-laran ita mós haka’as serbisu hamutuk di’ak liután hodi atende no prevene moras ne’ebé hosi animál ne’e, mak moras raiva,” nia salienta.

Sekretáriu Estádu Pekuaria, José Vieira de Araújo, hateten, fórum ne’e importante tebes hodi halo diskusaun no fahe hanoin oinsá bele solusiona no prevene moras raiva.

“Durante ita halo prevensaun, ita hetan apoiu husi Governu Austrália, ne’e hanesan parseiru estratéjiku. Agradese ba Human Development ho UNTL, ne’ebé bele realiza ona semináriu ne’e, tanba ida-ne’e importante loos, esperiénsia Covid-19 hatudu mós ba ita katak iha buat barak mak di’ak ona no iha buat barak mak falla, entaun ne’e hanesan sai ona referénsia boot ba ita,” governante dehan.

Nia argumenta, ho rekursu ne’ebé menus, la hamate vontade no serbisu ida-ne’e tanba presiza ekipa integradu hodi halo prenvensaun.

“Ami vizita sira iha fatin barak, sira-nia ekipa serbisu maka’as tebes to’o iha illa Ataúru, to’o iha área rurál sira, ne’e sira serbisu duni, la’ós sira mesak de’it. Ita ko’alia kona-ba prevensaun ita hamutuk mós ho ekipa integradu ne’ebé serbisu hamutuk ho MS, OMS, no entidade relevante hotu hamutuk ho PAM sira hotu. Sá estratejia mak ita halo bainhira ita rona katak ema mate tan moras ne’e maka ita alarga kedas ba Embaixada Repúblika Indonézia no ita enkontru hodi hasai karta ida ba iha Kupang NTT, aleinde ita halo vijilánsia iha rai-laran sira mós halo vijilánsia iha sira-nia territóriu ne’ebá, entaun ida-ne’e mak ita halo,” José Vieira, haktuir.

Hodi halo serbisu sira ne’e, Timor-Leste hetan apoiu husi parseiru sira no Governu Austrália, hanesan ekipamentu, ai-moruk no seluk tan.

“Governu Austrália Hanesan parseiru estratéjiku ne’ebé sempre apoiu ita iha buat barak, entaun rekursu ne’ebé ita uza hodi halo prevensaun,” nia reforsa.

Aleinde ne’e, iha ona dekretu-lei nú 12/2014 kona-ba restrusaun movimentu animál, tanba ne’e aleinde ko’alia kona-ba animál seluk no asu, iha lei ne’e deskreve katak se mak iha asu karik tenke kesi, ou tata ema karik nia na’in tenke responsabiliza.

“Ita hasai lei ne’e hodi vigora iha ita-nia rai doben Timor-Leste, entaun saida mak ita halo, atravez sensibilizasaun husi mídia sosiál, televizaun mós ita halo, ita halo sosializasaun to’o iha nível komunitáriu. Serbisu hirak ne’e mak ita no ekipa tomak halo no ikus mai la’o ho di’ak,” nia esplika.

Semináriu ne’e partisipa husi entidade sira husi Fakuldade Siénsia Saúde no Medisina, Prezidente Autotidade munisípiu, Diresaun sira husi ME no MAP nian, inklui parseiru Austrália.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!