iklan

COVALIMA, HEADLINE

Vítima dezastre naturál iha Suai Loro simu apoiu emerjénsia

Vítima dezastre naturál iha Suai Loro simu apoiu emerjénsia

Autoridade Covalima entrega apoiu emerjénsia ba vítima dezastre naturál iha suku Suai Loro. Foto/Celestina Teles.

COVALIMA, 12  Juñu 2024 (TATOLI) – Autoridade Protesaun Sivíl (APC, sigla portugés) hamutuk ho  Servisu Munisipál ba Jestaun Risku Dezastre Naturál no Sentru Solidariedade Sosiál distribui, ohin, apoiu emerjénsia ba vítima dezastre naturál, iha suku Suai Loro, munisípiu Covalima.

“Ohin ita kontinua fó apoiu emerjénsia ba vítima dezastre naturál ne’ebé foin lalais ekipa autoridade Covalima evakua bá sentru evakuasaun iha Eskola Sekundária Públiku Suai”, Komandante APC, Inspetór Xefe Flávio dos Santos Mendes, hateten iha edifísiu Sentru Solidariedade Sosiál Suai Loro.

Apoiu emerjénsia ne’e disponibiliza ba kada xefe família hanesan foos saku ida ho kilógrama 25, biti, manta, no seluk tan. Antes ne’e, autoridade fó ona apoiu alimentasaun ba vítima sira durante kalan rua, loron tolu, ho osan besik rihun $5.

Tuir dadus, rejista vítima katástrofe iha suku Suai Loro hamutuk família 215, husi númeru ne’e mai husi aldeia Loro, Lo’o no Mane-Ikun .

Vítima dezastre naturál Ermelinda Soi Fahik agradese ba Governu tanba fó ona apoiu ba sira iha situasaun emerjénsia hodi bele aguenta ba responde nesesidade durante semana ida ka rua.

“Udan ne’ebé akontese, ekipa lori ami bá sentru evakuasaun tanba hakarak salva ami-nia vida. Maske buat barak mak ami so’e hela iha uma”, nia dehan.

Notísia relevante: Inundasaun iha Suai Loro obriga retira ema 546 husi nia hela fatin

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!