PAM Bobonaro husu komunidade asiste Kopa Europa 2024 ho hakmatek
BOBONARO, 21 juñu 2024 (TATOLI) – Prezidente Autoridade Munisipál (PAM) Munisípiu Bobonaro, Alexandrino Pires, husu ba komunidade liuliu joven sira atu asiste eventu Futeból Kopa Europa tinan 2024 ho responsabilidade no hakmatek.
Tuir nia, komunidade sira bele espresa sira-nia sentimentu kontente, maibé labele halo komboiu ba mai no halo barullu hodi perturba orden públika liuliu ema-nia deskansa iha tempu kalan.
Notisia relevante: ETO+ hetan direitu eskluzivu halo transmisaun EURO 2021 iha TL
“Ha’u-nia mensajen ba ha’u nia-alin sira hotu, bainhira ita asiste Kopa EURO ita atu espera de’it ita-nia kontenti ba fans sira ne’e mais la signifika atu halo pawai, manán ka lakon ida-idak hakmatek iha ninia uma, tanba lakon ema mak lakon, manán mós ema mak manán, ita so fans de’it,” nia informa ba Jornalista sira iha Maliana, sesta ne’e.
Nia husu mós ba joven sira atu prepara-aan didi’ak, tanba governu sei realiza atividade desportu komunitária iha Maliana hodi komemora loron proklamasaun independensia Timor-Leste 28 Novembru tinan ne’e.
“Ha’u kontente dalaruma loraik-loraik ha’u liu kampu ne’ebá haree, ha’u ko’alia ho joven sira dehan prepara imi-nia saúde halo didi’ak, labele halo problema, ita halo ita-nia atividade desportu, imi bele espresa imi-nia talentu sira-ne’e,” nia fo hanoin ba joven sira.
Komandante PNTL Munisípiu Bobonaro, Superintedente Xefe Agustino Gomes da Silva, orienta ona membru sira atu halo patrullamentu hodi kontrola komunidade sira-ne’ebé asiste Kopa Europa 2024 iha ida-idak aldeia no bairru.
“Ema barak kalan-kalan haree jogu ne’ebé hala’o iha Europa liuhusi televizaun, mas husi buat sira haree balu di’ak, balun ladún di’ak, purezemplu kalan haree tiha joga, sai tiha estrada ema barak hakilar, baku eletrisidade riin, baku kalen halo barulu iha sidade laran, atitude hanesan ne’e ladi’ak,” nia hateten.
Notisia relevante: Argentina prontu apoia Timor-Leste dezenvolve futeból
Jornalista: Sergio da Cruz
Editór: Evaristo Soares Martins
