BOBONARO, 25 juñu 2024 (TATOLI) — Prezidente Repúblika, José Manuel Ramos Horta, husu no fó hanoin ba IX Governu Konstitusionál lideradu Primeiru Ministru, Kay Rala Xanana Gusmão, atu aselera dezenvolvimentu infraestrutura iha área rurál tanba tinan 20-resin ona povu iha munisípiu Bobonaro sei halerik ba kondisaun estrada.
Mandatu IX Governu kompleta ona tinan ida, normalmente sei falta tinan tolu liu atu halo serbisu, tanba ne’e Xefe Estadu fó hanoin katak presiza foka ba dezenvolvimentu infraestrutura liuliu estrada razaun kondisaun estrada hahú husi Gleno, Atsabe, munisípiu Ermera ba to’o fronteira munisípiu Bobonaro iha suku no aldeia kuaze barak mak aat no hetan estragu.
Notísia relevante: PR Horta fó hanoin Governu tau prioridade ba projetu ne’ebé la’o ona
“Tinan tolu nia laran estrada husi Gleno to’o fronteira, tama ba aldeia suku sira, la halo, ne’e bele dehan fallansiu boot ida, lakon povu nia konfiansa, ne’e duni IX Governu, Avo Nana nia la rezolve problema estrada, ha’u mai iha-ne’e (Bobonaro), ha’u buka ai ida aas liu ha’u tara-aan iha-ne’e,” Xefe Estadu ko’alia iha Kolimau, tersa ne’e.
Xefe Estadu husu investe mós ba setór agrikultura, bee-moos no seluk tan, atubele apoia agrikultura família no grupu.
Iha setór edukasaun, Ministériu pdukasaun presiza harii eskola barak liután no halo rekrutamentu ba profesór sira ho kualidade.
“La’ós tama politizadu, hatama ema arbiru, sé ita hanoin edukasaun importante ba kosok-oan sira, ba joven sira iha future, labele halimar ho politiza partidu sira halo fali ho edukasaun, ninia ema tún sa’e, profesór tenke matenek, tenke iha estudu, tenke iha integridade atubele hanorin labarik sira. Ne’e duni labele rekruta arbiru, tenke halo ezame nasionál, tenke liuhusi kursu profesór, nune’e aprende liután,” Premiadu Nobel da Paz ne’e fó hanoin.
Ba setór Saúde, Ministeriu Saúde presiza kontrui fasilidade ida-ne’ebé kualidade no kompleta medikamentu, tanba iha fatin barak sei falta medikamentu.
“Ita rona loron-loron falta medikamentu, tanbasá mak derrepente falta medikamentu, governu tinan ida ona iha servisu, oinsá mak bele falta ida-ne’e, medikamentu ne’e la’ós mai husi fulan, nia mai besik, bele mai husi Austrália, Índia no husi Indonézia. Ita iha osan ita sosa, maibé tenke matenek ho kakutak ho planeamentu halo importasaun medikamentu,” Xefe Estadu hateten.
Notísia relevante: PR Horta husu Governu prioriza setór agrikultura
Jornalista: Sérgio da Cruz
Editór: Evaristo Soares Martins
