Governu halo ona intervensaun merkadu ba foos marka MKAE iha Lautem
DILI, 27 juñu 2024 (TATOLI)— Prezidente Sentru Lojístika Nasionál (CLN), António de Araújo Soares, informa, Governu halo ona intervensaun merkadu ba foos marka MKAE iha Munisípiu Lautem ho tonelada 50.
Tuir nia, ba Munisípiu Lautem tomak Governu la bele responde hotu, tanba intervensaun ne’e bazeia ba dadus hosi Autoridade Munisípiu nian.
“Normalmente ita la bele hatan hotu ba Munisípiu tomak, tanba intervensaun ida ne’e priroridade ba ema vuneravel sira, entatun se mak identifika ida ne’e mak hosi Autoridade Munisípiu sira mak haruka dadus ne’e mai, depois mak ita foin haruka ekipa tuun hodi lori produtu ne’e ba,” António de Araújo Soares informa ba TATOLI iha Delta Nova, ohin.
Nia dehan, ba Munisípiu Buacau sei hein koordenasaun ho Autoridade Baucau, oinsá halo intervensaun ida ne’e.
“Atu kontinua ba munisípiu sira seluk ne’e depende ba koordenasaun se mak preparadu liu, tanba dadus ne’e mai husi autoridade sira, entaun to’o agora seidauk mai. Se munisípiu ida ne’ebé mak mai uluk ona ita bele ba halo ona intervensaun, tanba ita bazeia ba lista entaun sira mós tenke simu responsabilidade ida ne’e,” nia subliña.
Notísia relevante:Komisaun D husu CLN halo intervensaun foos baratu to’o iha área rurál
Prezidente António de Araújo Soares esplika, to’o oras ne’e, CLN halo ona intervensaun merkadu ba foos marka MKAE ba munisípiu haat hanesan RAEOA, Ermera Dili-Ataúro no Lautem ho foos tonelada 200.
“Ita garante ba munisípiu sira seluk halo hotu intervensaun merkadu, tanba ita-nia foos iha armazem sufisiente hela,” nia haktuir.
Autoridade másima CLN ne’e dehan, folin foos sa’e makas iha kapitál Dili no mós munisípiu ne’e, tanba la’ós akontese iha Timor de’it maibé iha nasaun Índia hanesan nasaun produtór segundu iha mundu, bainhira nia hasoru klima bee la iha mak sira taka sira-nia esportasaun foos, entaun ho ida-ne’e mak difikulta folin foos sa’e.
Notísia relevante:CLN halo ona intervensaun merkadu ho foos tonelada 150
Jornalista : Felicidade Ximenes
Editór: Rafael Ximenes de A. Belo
