DILI, 05 jullu 2024 (TATOLI)—Ministru Justisa (MJ), Sérgio Hornai, klarifika ba públiku kona-ba informasaun ne’ebé espalla iha mídia sosiál katak Governu liuhusi MJ iha Diresaun Jerál Serbisu Rejistu no Notariadu provizoriamente hahú iha jullu nia laran sei hapara atendimentu pasaporte no sei funsiona hikas iha tinan 2025 nia laran, ne’e “hoax” ka la loos.
Notísia Relevante: Atendimentu pasaporte iha Dili la’o normál esetu munisípiu
“Ida-ne’e la loos. Ha’u hakarak hateten, neste momentu Ministériu Justisa halo hela atendimentu ba ita-nia sidadaun sira. Rekoiñese katak agora ita iha mákina ida mak sei funsiona hela para halo atendimentu,” Governante ne’e hateten hodi responde Agência TATOLI kona-ba informasaun ne’e iha resintu Parlamentu Nasionál (PN), sesta ne’e.
Ne’ebé, nia dehan, MJ nia orientasaun serbisu sira funsionamentu ba iha atendimentu la’o hanesan baibain, maske mákina aat maibé iha tempu badak ne’e mákina rua ne’ebé Governu sosa ona ona sei mai no bainhira to’o mai ne’e ba atendimentu hotu sei la’o di’ak.
Kona-ba kaderneta pasaporte, nia hateten, sei iha hela atu bele atende nesesidade no ministéiru justisa rasik hahú daudaun halo planeamentu oinsá bele halo akizisaun ba kaderneta foun.
Deputada opozisaun FRETILIN, Nurima Ribeiro Alkatiri, husu ministériu kompetente atu solusiona lalais mákina iha serbisu notariadu, hodi nune’e fó atendimentu di’ak ba sidadaun sira.
Notísia Relevante: PN husu investiga funsionáriu halo kobransa ilegál ba sidadaun trata pasaporte
Jornalista : Nelson de Sousa
Editór : Cancio Ximenes
