Top

Opozisaun husu Governu kontrola viatura Estadu sirkula iha sábadu-domingu

Viatura Estadu. Imajen TATOLI/Egas Cristóvão

DILI, 24 jullu 2024 (TATOLI)—Bankada opozisaun liuliu PLP no FRETILIN husu Governu Konstitusionál da-sia (IX) kontrola viatura Estadu nian ne’ebé sirkula iha loron sábadu-domingu.

Deputadu PLP, Helder Freitas ‘Kamarudi’, preokupa viatura Estadu barak agora kontinua sirkula iha loron feriadu.

“Kona-ba karreta Estadu nian, iha sábadu no domingu la’o operasaun hela. Iha Governu Konstitusionál da-ualu (VIII), karreta sira-ne’e segunda to’o domingu ne’e para de’it iha edifísiu. Bainhira viajen ba munisípiu, kargu xefia sira fó karta akompaña mak sira serbisu ba Estadu nian. Se (agora) karreta para iha motorista sira-nia uma, kalan no loron mós halai no iha sábadu no domingu mós halai, ne’e korrupsaun ka lae,” nia levanta liuhusi reuniaun plenária komisaun permanente iha sala plenária Parlamentu Nasionál, kuarta ne’e

Deputadu FRETILIN, Antonio Calau, mós hatten sirkulasaun karreta Estadu tanba tuir observasaun kargu xefia iha instituisaun públiku sira mak utiliza ka motorista sira mak uza ne’ebé kuaze iha loron sábadu-domingu ne’e sirkula nafatin iha tempu kalan no laran iha dalan públiku sira.

“Iha Governu da-ualu ne’e ita nunka haree. Nune’e, ita husu ba Governu da-sia atu kontrola aktu sira-ne’e, atu nune’e ita bele halo poupansa ba ita-nia osan,” nia dehan.

Entrertantu, iha reuniaun plenária komisaun permanente ne’e la marka prezensa husi reprezentante Governu liuhusi Vise Ministru ba Asuntu Parlamentár, Adérito Hugo da Costa, maibé tékniku sira de’it mak marka prezensa hodi rejista preokupasaun Deputadu sira-nian, maibé nia parte sei enkamiña preokupasaun sira ba ministériu tutela atu bele tau atensaun.

Enkuantu, kuarta ne’e, PN realiza reuniaun plenária dahuluk ba komisaun permanente, ne’ebé prienxe kórum partisipa husi Deputadu na’in-11 husi bankada parlamentár sira.

Deputadu sira iha Parlamentu Nasionál ne’e, hahú iha 15 jullum tama ona resesu no sei tama fali iha 15 setembru tinan ne’e, nune’e lejislatura da-neen kompleta sesaun lejislativa dahuluk sei tama ba sesaun lejislativa daruak, mandatu lejislatura ida iha tinan lima no iha sesaun lejislativa hamutuk dalimak.

Nune’e, PN deside ona kada semana ida  iha loron kuarta realiza reuniaun plenária komisaun permanente no Deputadu membru komisaun permanente ne’e iha membru hamutuk na’in-19 ne’ebé mai husi bankada parlamentár sira.

Notísia Relevante: Ekipa konjunta nota ministériu balun utiliza viatura Estadu ba interese privadu

Jornalista : Nelson de Sousa

Editór         : Cancio Ximenes

Publisidade

Leave a Reply

Latest Post

error: Content is protected !!