DILI, 20 agostu 2024 (TATOLI)–Ministru Administrasaun Estatal (MAE), Tomás do Rosário Cabral, hateten, MAE aprezenta orsamentu adisionál hamutuk millaun $4 ba Komité Revizaun Orsamentu (KRO) 2025.
Notísia Relevante: PN aprova proposta OJE 2024 MAE millaun $54,4 iha espesialidade
Governante ne’e esplika, tetu orsamentu ne’ebé KRO aprova ba MAE hamutuk millaun $24 no sira hasai tiha tiha millaun $22 ba munisipiu, no ida-ne’e mak sira reajusta ho munisipiu sira.
“Maibé, ami iha proposta adisionál liuliu ba iha tinan oin, ba komemorasaun tinan 50 loron proklamasaun unilateráal 28 novemvru ne’e, orsamentu adisionál hamutuk millaun $4,” Ministru Administrasaun Estatál, Tomás do Rosário Cabral, hateten ba jornalista sira hafoin halo depoizde, aprezentasaun tetu orsamentu iha Ministériu Finansa.
Nia aprezenta total orsamentu ne’e, Komité Revizaun Orsamentu (KRO) sei haree no analiza, montante adisionál hira mak sei aloka ba ministériu, tanba orasamentu sira balun hela ba iha ministériu sentrál hodi bele haree ba nesesidade insituisaun ne’ebé kontinua administradu.
Nia esplika, tetu orsamentu no adisionál ne’e atu haree ba programa sira iha 2025 ho programa prioriodade sira hanesan Programa Dezenvolvimentu Nasionál Suku no programa suku 422.
“Tanba, ita iha dekretu lei ida kona-ba jestaun administrasaun suku. Iha ema na’in-haat iha suku ne’ebé sei iha ministériu sentrál mak selu,” nia esplika.
Governante ne’e hateten, iha aprezentasaun KRO ne’e aprova mós orsamentu ba iha Institutu Nasionál Arkivu Timor-Leste, Sekretariadu Tékniku Administrasaun Eleitorál ne’e ba kartaun biométriku no Institutu Nasionál Adminisrasaun Públika no Fundu Espesiál Dezenvolvimentu Ataóro.
Jornalista : Jesuína Xavier
Editór : Cancio Ximenes
