Konsulta Populár iha Bobonaro sei festeza ho ferik-katuas sira
BOBONARO, 23 agostu 2024 (TATOLI) – Autoridade Munisipál Bobonaro, sesta ne’e realiza enkontru ho administradór postu administrativu neen, diretór diresaun servisu munisipál no delegasaun territorial sira hodi diskute preparasaun atu selebra loron konsulta populár 30 agostu ba da-25.
Prezidente Autoridade Munisipál Bobonaro, Alexandrino Pires, informa Primeiru Ministru, Kay Rala Xanana Gusmao orienta katak festa populár ne’e tenke festeza ho inan-aman ferik-katuas sira tanba sira mak sasin moris ba konsulta populár 30 agostu 1999 no eroi ba ukun-an.
Notísia Relevante: Konsulta Populár ba da-25: PPN apela timoroan hamutuk luta ba dezenvolvimentu
“Ita realiza festa konsulta populár ne’e nune’e inan-aman sira lori re-lembra fila-fali sira ne’ebé ita hasoru iha tinan 25 liubá, aumesmu tempu ba ita-nia joven barak mak balu moris iha tinan 2000 mai, sira la apár ho situasaun ida ne’e mós ai matéria edukasaun sívika ba joven-sira atu nune’e sira komprende katak afinál situasaun iha tinan 25 liubá difisiltebes ba ita-nia inan-aman sira,”nia hateten iha salaun Maria-Tapo.
Nia atividade ne’ebé sei reliza uniformiza ho nasionál no sei junta mós ho atividade ne’ebé planeadu administradór postu administrativu neen iha munisípiu Bobonaro hanesan limpeza jerál iha semitériu eroi sira-nia ne’ebé sei hala’o iha 28 agostu inklui ho animasaun.
Alende ne’e iha 29 agostu sei realiza misa agredisimetu ne’ebé sei prezide hosi pároku idak-idak, hafoin ne’e ba kari ai-funan iha semitéeriu no jardín eroi-sira kontinua kedas ho animasaun desportu komunitária hanesan dada-tali, sa’e-bua no seluk tán inklui dahur tebe-tebe.
Iha serimónia prinisipál 30 agostu dadeer sei realiza atividade marsa saudável, hafoin kontinua ba serimónia solene kanta inu nasionál no diskursu husi membru governu no prezidente autoridade munisipál.
Hafoin ne’e sei konvida sasin moris sira-ne’ebé partisipa iha konsulta populár 1999 hodi konta istória ne’ebé iefrenta iha tinan 25 ba kotuk. Alende ne’e sei iha mós atividade konsertu múzika, dahur to’o ensera iha 31 agostu dadeersan.
“Ida-ne’e la’ós feta joventude atu bolu pasangan ba malu, maibé ne’e festa populár fó tempu tomak ba inan-aman sira, atu festeza sira-nia sentimentu kontente ba rezultadu ukun-an, sei anima mós sira ho filmazen,” nia katak.
Autoridade Munisipál Bobonaro sei aloka orsamentu ba kada postu administrativu neen minimu $1,000 no másimu $2,000 depende ba postu ne’ebé iha suku barak.
Biban ne’e, Administradór Postu Administrativu Bobonaro, Tomás Henrique, prefere postu administrativu Bobonaro tenke hetan alokasaun orsamentu ho montante liu postu seluk, tanba iha kedas suku 18 no aldeia 63.
“Osan ne’e kada postu $2,000, hau hanoin la sufisiente atu akumula suku 18,” nia hateten.
Alende ne’e administradór postu administrativu Cailaco,Afredo da Cruz,hateten postu Cailaco sei realiza atividade importantel iha Poerema ba to’o Kapela Anahun,suku Odomau,postu Maliana.
Enkuantu komemorasaun ne’e nivél munusipál sei realiza iha kampu Futeból Maliana no sei realiza mós kada postu administrativu, ne’ebé sei prezide husi membru governu akompaña husi autoridade nmunisipál Bobonaro.
Notísia relevante: Konsulta populár ba da-25 sei selebra iha postu administrativu sira
Jornalista: Sérgio da Cruz
Editór: Evaristo Soares Martins
