Jornalista Timoroan na’in tolu to’o ona Vaticano
ROMA, 29 agostu 2024 (TATOLI) – Jornalista Timoroan na’in tolu, Virginia dos Santos Silva husi RTTL, E.P, Delfim de Oliveira husi GMN, no Filomeno Martins husi Agência Noticiosa de Timor-Leste, I.P (TATOLI, I.P) to’o ona Roma hodi akompaña viajen Sua Santidade Papa Francisco ba nasaun Ázia haat, inklui Indonézia, Papua-Nova Guiné (PNG), Timor-Leste no Singapura.
Hafoin sai husi Dili iha loron 28 agostu, ho viajen naruk, jornalista na’in tolu ne’e to’o iha Aeroportu Internasionál Roma iha loron 29 agostu, tuku 8.55 kalan no simu husi ekipa Embaxada Timor-Leste iha Vaticano ho di’ak.
Tuir ajenda, jornalista hotu ne’ebé mak sei akompaña Sua Santidade nia viajen sei marka prezensa iha konferénsia imprensa ne’ebe mak sei hala’o iha loron 30 agostu, tuku 6.25 lorokraik, iha Roma. Konferénsia ne’e sei foka ba preparasaun kobertura viajen Amu Papa Francisco.
Atu garante kobertura ho didi’ak, antes dezloka ba Vaticano, Sekretáriu Estadu Komunikasaun Sosiál, Expedito Dias Ximenes, husu ba jornalista na’in tolu atu halo kobertura ho didi’ak hodi habelar informasaun kona-ba Viazen Amu Papa nian ba mundu, no Timor-Leste.
Jornalista na’in tolu sei reprezenta media Timor-Leste iha Roma, tanba ne’e mak Governante ne’e husu atu sira mantein profesionalizmu durante sira-nia kobertura ba viazen Papa Francisco.
Ministru Administrasaun Estatál, Tomás do Rosário Cabral mos apela ba jornalista na’in tolu atu mantein balansu no profesionalizmu ba kobertura viazen Amu Papa.
Tuir oráriu, viazen Apostólika Papa Francisco sei hahú iha loron 2 setembru no sei termina iha 13 setembru.
Viazen Amu Papa sei hahú ho Idonezia, ne’ebé mak nia sei to’o iha Jakarta iha loron 3 setembru to’o 6 setembru. Hafoin Indonézia, Papa Francisco sei kontinua nia viazen bá Papua-Nova Guiné entre 6 no 9 setembru. Entre 9 no 11 setembru, Sua Santidade sei halo nia vizita mai Timor-Leste no hafoin Dili, Papa Francisco kontinua kedas nia viazen ikus ba Singapura entre 11 no 13 setembru.
Notísia relevante:Aban, jornalista Timoroan na’in tolu sei arranka ba Vaticano
Journalist: Filomeno Martins
Editór: Rafael Ximenes de A. Belo
