DILI, 06 setembru 2024 (TATOLI)—Xefe bankada KHUNTO iha Parlamentu Nasionál (PN), António Verdiál de Sousa, iha esperansa ho vizita Sua Santidade Amu Papa Francisco mai Timor-Leste ne’e, líder nasionál sira bele hamutuk iha unidade hodi dezenvolve nasaun ne’e ba oin no hasa’i povu husi mukit.
Notisia Relevante: FRETILIN konsidera vizita Papa Francisco lori dame no esperansa
“Kontente tebes ho vizita Amu Papa nian iha ita-nia rain. Ho prezensa ne’e, ita iha esperansa boot katak, ita-nia na’in-ulun sira bele fó liman ba malu, hadomi malu no hakuak malu. Espesialmente, ba líder polítiku sira tenke hamutuk hodi haree futuru nasaun ida-ne’ebé mak dook,” Nia hateten ba jornalista sira iha resintu Parlamentu Nasionál, sesta ne’e.
Nu’udar sarani, nia dehan, ba vizita Amu Pala ida ne’e grasa boot ida mai Timor-Leste, tanba antes TL ukun-aan ne’e Timor-Leste hetan ona vizita husi Papa João Paulo II, nune’e hanoin ita ukun-aan iha tan vizita husi Amu Papa Francisco ne’e di’ak tebes.
“Iha esperansa boot ho prezensa Sua Santidade Papa Francisco iha rai Timor, ita bele hetan grasa. Dedika ba ita-nia na’i-ulun sira liuliu lidér polítiku sira fó liman ba malu atu nune’e hamutuk,” nia hateten
Nia hato’o mensajen ba sarani sira hotu atu prepara aan didi’ak hola parte simu Amu Papa ne’ebé sei iha misa iha Tasi-Tolu.
“Ne’e hanesan oportunidade ne’ebé di’ak, tanba ita atu hasoru Amu Papa ne’e susar tebes no tenke ba to’o Vátikanu. Ne’ebé ho previleIju no onra boot ida ba ita sarani Timor-Leste,” nia hateten,
Tanba ne’e, tuir nia, ba sarani no timoroan hotu nafatin kria pás no estabilidade hodi bele simu Amu Papa mai iha Timor-Leste.
Notisia Relevante: PPN: Vizita Papa Francisco lori grasa mai Timor-Leste
Jornalista : Nelson de Sousa
Editór : Cancio Ximenes
