DILI, 09 setembru 2024 (TATOLI)—Autoridade seguransa, segunda (09 setembru 2024) ne’e, tuku 10h00 dadeersan, hahú blokeia dalan protokolu ba movimentu transporte públiku hahú husi área Aeroportu Internasionál Prezidente Nicolau Lobato, Comoro, to’o iha Nunsiatura Apostólika Motael, nu’udar dalan ne’ebé Sua Santidade Papa Francisco, sei liu bainhira to’o iha Timor-Leste iha tuku 14h30 lorokraik.
Notísia Relevante: PNTL sei blokeia dalan protokolu ne’ebé Amo Papa liu
Tuir observasaun jornalista Agência Tatoli iha terrenu, dadeersan ne’e komesa husi área rotunda estátua Nicolau Lobato, Comoro, to’o mai Nunsiatura Faról, autoridade seguransa liuhusi Polísia Nasionál Timor-Leste (PNTL), akompaña mós husi Konsellu Polisiamentu Komunitáriu ne’ebé destaka kada área, hodi hahú taka dalan ba movimentu transporte públiku, eseptu ba movimentu karreta verry importante person (VIP), karreta operasionál ne’ebé hala’o serbisu preparativu atu simu vizita Papa Francisco iha Timor-Leste.
Iha terrenu hatudu, estrada protokolu husi área sira-ne’e laiha sirkulasaun transporte públiku maibé haree-hetan de’it sarani sira mak la’o ba-mai hodi halo preparasaun atu hein Santu Padre Papa Francisco tuun iha aeroportu Internasionál Preziente Nicolau Lobato, Comoro, Dili, iha tuku 14h30 lorokraik ne’e.
Notísia Relevante: Dili hakmatek hein Santu Padre Papa Fransisco
Iha dalan portokolu sira-ne’e, iha dalan-ninin sira, hetan seguransa makaas husi parte membru PNTL inklui patrollamentu forsa tarefa ekipa konjunta husi Polísia Nasionál Timor-Leste (PNTL) no Falintil-Forsa Defeza Timor-Leste (F-FDTL).
Tuir ajenda vizita pastorál husi Sua Santidade Papa Francisco mai Timor-Leste durante loron tolu ne’ebé sei hahú husi 09-11 setembru 2024.
Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste
Jornalista : Nelson de Sousa
Editór : Cancio Ximenes
