DILI, 11 setembru 2024 (TATOLI)—Pier Luigi, jornalista ida husi Vaticano, halo hela tratamentu saúde iha Hospital Nacional Guido Valadares (HNGV) tanba problema saúde.
“Hetan moras hemorosis,” Diretór Servisu Nasionál Ambulansia Emerjénsia Médika (SNAEM), Simplicio Amaral de Deus ba TATOLI via telefonika ohin.
Nia dehan, moras hemorosis ne’e labele han ai-manas maibé jornalista ne’e antes ne’e nia konsumu ai-manas iha Indonézia to’o mai Timor-Leste (TL). Entaun provoka raan sai iha ‘fo’er boot’ nune’e mak ekipa SNAEM lori jornalista ne’e ba i ha Timor Plaza tuku 10 dadeer, pois lori ba HNGV halo tratamentu saúde. “Daudaun ne’e sei iha ne’ebá hela,” nia esplika.
Sarani 25 monu
Nia haktuir, bainhira amo papa fila fali ba Aeroportu Internasional Nicolau Lobato sarani barak kontinua hein iha dalan-dalan, nune’e sarani hamutuk 25 mak monu iha rotunda Nicolau lobato no parte ambulánsia evakua ba postu saúde ne’ebé mak harii besik iha ne’ebá hodi halo tratamentu to’o di’ak.
“Sira ne’ebé mak monu ne’e maioria joven tanba rai-manas, hamlaha, kolen. Entaun, ami-nia ekipa evakua kedas ba postu saúde ne’ebé mak harii besik rotunda halo tratamentu to’o diak,” nia konklui.
Notísia relevante:SNAEM transporta sarani sira monu husi rotunda to’o Ai-mutin hamutuk na’in-haat
Jornalista : Felicidade Ximenes
Editór: Rafael Ximenes de A. Belo
