Papa Francisco fó motivasaun ba joven timoroan sai autór ba dame
DILI, 13 setembru 2024 (TATOLI)—Sua Santidade Papa Francisco hala’so sorumutu ho reprezentante juventude Timor-Leste hamutuk 3.000 iha Sentru Konvensaun Dili (CCD, sigla protugés) ne’e. fó motivasaun ba foinsa’e timoroan sira atu sai autór ba dame.
Notísia Relevante: “Joven ne’ebé lahatene mehi, joven ne’e hanesan reforma ona husi moris”
“Ha’u-nia esperansa boot mak Amu Papa sei mai fó movitasaun ida kle’an ba ita foinsa’e timoroan, atu nune’e bele sai autór ba dame. Tanba, dala barak liu iha fatin ne’ebé de’it temi foinsa’e mak sai autór ba problema. Entaun ha’u fiar katak, ho prezensa Sua Santidade mai ita-nia rain, ita hotu sai autór ba unidade no pás iha ita-nia rain,” Janu nu’udar Joven Katólika hato’o ba Agência Tatoli, kuarta (11 setembru 2024).
Ho prezensa Papa Francisco nian, ho esperansa ne’ebé mak iha mak joven hotu-hotu atu kaer malu unidade nafatin, atu nune’e mezmu Timor-Leste nasaun joven maibé ninia emar sira nafatin unidade, haketak tiha buat ne’ebé la’ós ona sai timoroan nia identidade no kultura. maibé tenke prezerva no kontinua haburas dame iha Timor-Leste.
Nune’e, nia hateten, enkontru ho Amu Papa iha esperansa boot katak, timoroan sei iha amigu no pás, no timoroan sei laiha tan ona inimigu ona maibé timoroan tenke ativu sai autór dame ba nasaun Timor-Leste.
Aleinde ne’e, reprezentante joven, Gracia mós iha esperansa ho sorumutu ho Papa hametin ninia espíritu relijiaun no fiar hodi hametin relasaun di’ak liután ho Maromak, komprende liután papel ida sarani ba indivídu ida-idak iha sosiedade, atu timoroan hanoin krítika liután kona-ba fiar no kna’ar iha TL.
Entretantu, reprezentan juventude, Xisto Ximenes da Crus, sente hakslok tebes ho Santu Padre Papa Francisco nia vizita mai Timor-Leste, tanba husik hela mensajen kle’an ida ba juventude sira katak joven ne’e keta ofersea aan atu ema sleuk esplora.
“Ha’u sente kontente, tanba durante ne’e akompaña Amu Papa husi televizaun de’it maibé ohin loron bele hetan direitamente. Papa nia liafuan ne’ebé ba jovens ira katak joven keta husik ema seluk esplora ita, entaun joven tenke sai krítiku na’in no liafuan ne’ebé fó esperansa, motiva joven la’ós futuru nian maibé tempu futuru komesa ohin,” nia hateten.
Notísia Relevante: Papa Francisco husu joven sira tenke aprende valór fraternidade
Jornalista : Nelson de Sousa
Editór : Cancio Ximenes
