DILI, 24 setembru 2024 (TATOLI)—Deputadu PLP, Maria Angelina Sarmento, husu ministériu kompetente presiza tau atensaun ba sidadaun balun tau roda iha Tasi-Tolu hodi treinu karreta no motor iha fatin sagradu ne’ebé foin lalais Sua Santidade Papa Francisco hodi prezide misa.
Notísia Relevante: Membru PN husu Governu transforma Tasi-Tolu sai sentru relijiozu turístiku
“Ha’u iha asuntu ida iha ne’e hakarak levanta iha ne’e. Simu informasaun, haree roda forma hodi tau iha Tasi-Tolu iha fatin ne’ebé ita realiza misa husi Santru Padre, ema balun utiliza tiha fatin ne’e hodi treinu karreta, nune’e husu atu enkamina ba ministériu relevante hodi fó atensaun ba fatin ne’e hodi proteje no kuidadu fatin ne’e ho di’ak. Labele autoriza ema atu tau roda iha ne’eba hodi treinu karreta,” Nia levanta liuhusi reuniaun plenária Parlamentu Nasionál, tersa ne’e.
Nune’e, nia husu ba Vise Ministru ba asuntu Parlamentár, Adérito Hugo da Costa, atu enkamina kestaun ne’e ba entidade tutela hodi tau atensaun.
Antes ne’e, iha reuniaun plenária, Deputada Maria Angelina Sarmento, mós husu Governu atu koordena ho Igreja liuliu Konferénsia Episkopál Timorense (CET, siglá portugés) atu tranforma Tasi-Tolu ba sentru relijiozu turístiku.
“Ha’u, hakarak sujere, ba medida, ita foin hotu selebrasaun misa husi Santu Padre nian, husu Governu atu tau atensaun ba fatin hanesan iha Tasi-Tolu, liuliu presiza kria plaka ida iha ne’eba ne’ebé halo istória breve ida kona-ba vizita Santu Padre nian. Ema hirak mak tama iha ne’eba, depois sita husi ne’e hahú husi sá loron, momentu istóriku ida-ne’e ita presiza hakerek,” bnia hateten.
Tanba, nia dehan, iha fatin istóriku barak mak Timor-Leste falla atu iha istória breve ida tau iha ne’eba, hodi nune’e iha futuru ema mai haree karik la presiza husu verbal ba seguransa ka ema ruma destakadu hein iha ne’eba.
“Nune’e ema ba iha ne’eba haree de’it plaka ne’eba hatene ona, iha 9 setembru 2024 Papa nia vizita no iha 10 setembru misa iha Tasi-Tolu ema ho totál rihun 600-resin ka rihun 700 mak tama iha ne’e tuir misa, istória bo’ot Timor-Leste halo iha tempu ne’eba. Lembransa Governu da-sia nian lideradu husi Primeiru Ministru, Kay Rala Xanana Gusmão, pelumenus buat ruma hakerek iha ne’eba,” nia rekomenda.
Tanba, nia dehan, iha fatin turismu Kristu Rei iha fatucama ne’e laiha buat ida hakerek iha ne’eba, inklui mós iha antigun altar uma adat iha Tasi-Tolu ne’ebé Papa João Paulo II mai halo misa ne’e mós laiha plaka ruma hatuur iha ne’eba.
Nia husu, orsamentu millaun $12 ne’ebé antes ne’e aloka hodi halo preparasaun ba simu vizita Santu Padre Papa Francisco nian, karik sei iha aproveita atu dezenvolve fatin ne’e no ba oin Timor-Leste iha istória ida eskrita la’ós verbal de’it.
Nia mós sujere atu kria regra ba vizitante sira bainhira vizita iha fatin Tasi-Tolu no tama karik mantein nafatin nu’udar sai fatin sagradu.
Deputadu CNRT, Natalino dos Santos, mós husu Governu atu serbisu hamutuk Igreja dezenvolve fatin Tasi-Tolu sai fatin sentru turizmu relijiozu.
Jornalista : Nelson de Sousa
Editór : Cancio Ximenes
