Top

CNRT-PD halo avaliasaun ba kuadru sira-nia dezempeñu iha estrutura Governu da-sia

Embaixadór Timor-Leste iha Jenebra, António da Conceição “Kalohan”. Imajen Tatoli/António Gonçalves.

DILI, 02 outubru 2024 (TATOLI)—Deputadu Partidu Demokrátiku (PD) iha Parlamentu Nasionál (PN), António da Conceicão ‘’Kalohan’’, dehan iha sábadu (29 setembru 2024) liu-ba ne’e, PD realiza enkontru hodi hala’o avaliasaun ba nia kuardu sira-ne’ebé hola parte iha estrutura Governu Konstituisionál da-sia (IX) hodi haree sira-nia dezempeñu serbisu durante tinan ida.

Notísia Relevante: Governu Konstitusionál da-sia kompleta tinan ida ukun hodi halo reflesaun

Nia dehan, enkontru ne’e ho intensaun halo koordenasaun entre membru Governu husi PD nian iha IX Governu Konstituisionál no mós ho Deputadu sira husi PD atu fó hanoin malu kona-ba sira-nia serbisu ne’ebé dalabarak foti kestaun sira iha Parlamentu Nasionál (PN) hanesan parte saúde no folin sasán sa’e.

“Ami husu kada membru Governu iha partidu nia laran hato’o sira-nia serbisu. Ami fó hanoin sira mós bele hakaas aan atu hala’o serbisu ho didi’ak no identifika problema ne’ebé sira hasoru iha instituisaun nia laran,” Atuál Sekretáriu Jerál Partidu Demokrátiku (PD), António da Conceição “Kalohan”, hateten ba Agência TATOLI iha resintu PN, kuarta ne’e.

Enkontru ne’e buka hatene mós problema sira-ne’ebé hasoru, hodi nune’e Deputadu sira bele hatene esplika iha PN ba públiku atu hatene, tanbasá mak sasán sira-ne’e la’o ladún di’ak iha governasaun ne’e.

“Ne’e mak objetivu primeiru halo enkontru koordenasaun ho membru Governu ho Deputadu sira no akompaña husi ezekutivu partidu nian atu bele hatene,” nia dehan.

Aleinde ne’e, ko’alia mós kona-ba serbisu sira-ne’ebé hala’o dalaruma tanba mós sira-nia dezempeñu ne’e rasik lori hodi ko’alia kona-ba posibilidade atu halo remodelasaun iha Governu, ezijénsia públiku nian maske Governu ne’e bele dehan iha PN ne’ebé reprezenta hela koligasaun sei la’o di’ak hela.

Maibé, tuir nia, buat sira-ne’e hotu lori públiku atu hetan atensaun ida kona-ba sira-nia serbisu ne’e rasik no lori públiku mak atu ezije hodi bele troka membru sira-ne’ebé ladún di’ak.

Ho situasaun sira-ne’e mak informa ba sira hodi sira rasik tenke hadi’a sira-nia dezempeñu serbisu iha ministériu no sekretária Estadu ne’ebé sira ida-idak hala’o hela kna’ar sira-ne’e.

“Rezultadu avaliasaun ami sente sira hala’o kna’ar di’ak hela. Karik, iha difikuldade ne’ebé iha mak dahuluk liña koordenasaun presiza atu halo entre membru Governu sira hodi bele ajuda malu. Nota mós, sira hotu mós preokupa, karik tanba ladún iha oportunidade partilla esperiénsia entre membru Governu sira. Tanba ne’e, iha posibilidade tempu badak sei hala’o koordenasaun nível koligasaun ninian hodi bele ajusta problema sira-ne’e hamutuk,” nia dehan.

Nia dehan, Primeiru-Ministru (PM) iha kompeténsia absoluta atu haree nia membru Governu sira-nia dezempeñu hodi halo avaliasaun no membru Governu hotu tenke submete ba desizaun ida-ne’e, no ida-ne’e di’ak ba nasaun no Estadu.

“Ita labele aposta beibeik ba ita-nia interrese, kuandu ita haluha tiha ema barak nia interrese. Ami ne’e, simu liafuan ida-ne’ebé Lasama ninia hanorin ba ami-ne’e dehan; ha’u-nia dignidade  la aas liu dignidade Estadu nian, signifika ami tenke halo buat hotu ne’e tanba nasaun, la’ós tanba ami ida-idak foti provetu pesoal ruma iha governasaun. Tan ne’e, se ida-ne’e akontese, ne’e realidade di’ak ba nasaun la’ós afeta ba nia aan pesoál. Nia ba partidu hakarak oferese nia aan atu serbí nasaun. Maibé se ninia kapasidade la to’o ou nia seidauuk bele serbí ho di’ak, hanoin Primeiru-Ministru mak iha kompeténsia ida-ne’e atu hola desizaun,” nia hateten.

Nia hateten, PD ho CNRT kontinua sólidu hodi lori governasaun ne’e to’o nia mandatu tinan lima ramata.

Xefe Bankada CNRT iha PN, Duarte Nunes, hateten foin lalais iha fim-de-semana liu-bá, partidu Congresso Nacional da Reconstrução Timorense (CNRT) mós halo avaliasaun ba nia kuadru sira-ne’ebé hola parte iha estrutura Governu Konstituisionál da-sia (IX) hodi haree sira-nia dezempeñu serbisu durante tinan ida.

“Ami mak partisipa no halo, ne’e ami-nia serbisu durante tinan ida tenke avalia. Rezultadu fó sai tiha ona iha komunikadu, husu ba iha partidu tanba partidu mak organiza. Ami hala’o tiha ona,” nia hateten.

Tanba ne’e, nia dehan, avaliasaun ne’e normál hala’o iha instituisaun ne’ebé de’it, to’o tempu ida presiza halo avaliasaun, nune’e nia lakohi ko’alia kona-ba rezultadu avaliasaun ne’e tanba ne’e partidu mak haree.

“Deputadu ne’e naran sai iha lista, karik iha avaliasaun ruma, partidu mak deside no la’ós ami mak deside. Governu mós hanesan buat hotu iha Primeiru-Ministru mak halo avaliasaun hodi deside,” nia dehan.

Maibé, nia dehan, avaliasaun ne’e haree ida-idak nia kna’ar no mós programa ne’ebé iha, entaun haree tuir ida-ne’e normál halo iha instituisaun ne’ebé de’it, to’o tempu ida presiza halo avaliasaun.

Jornalista : Nelson de Sousa

Editór       : Cancio Ximenes    

Publisidade

Leave a Reply

Latest Post

error: Content is protected !!