VIQUEQUE, 07 outubru 2024 (TATOLI)- Xefe suku Irabin de Baixo, postu Uatucarbau, munisípiu Viqueque, José Baptista do Carmo, informa, Institutu Jestaun Equipamentu no Apoiu Dezenvolvimentu Infraestrutura, Institutu Publiku (IGEADI, I.P), destaka ona ekipamentu pezadu iha suku Irabin de Baixo hodi normaliza mota Irabere ne’ebé kada tinan ameasa ba komunidade sira nia-natar iha área Baidubu.
“Ba normalizasaun ida-ne’e ha’u halo pedidu iha tinan kotuk (2023), maibé agora maka IGEADI, I.P foin aprova ami-nia pedidu, nune’e ekipamentu pezadu destaka ona iha ami-nia suku. Pedidu ne’ebé ami husu ba IGEADI, I.P halo normalizasaun ba mota Irabere, loke dalan no torre eletrisidade ne’ebé daudaun besik atu monu”, Xefe suku Irabin de Baixo, hateten ba Agência Tatoli, iha postu Uatucarbau, ohin.
Notísia relevante:Laiha morru protensaun, mota Irabere sobu natar ektare 26 iha Uatucarbau
Normalizasaun ne’e, nia dehan kuaze kilómetru haat hahú mota Irabere hodi kanaliza bee mota nian ba tasi, nune’e iha tempu udan labele fó impaktu ba agrikultór sira-nia natar.
“Alende normaliza ba mota Irabere, ekipa IGEADI, I.P sei loke mós dalan foun kuaze kilometru 15-resin ne’ebé hahú husi ami-nia suku Irabin de Baixu to’o suku Afaloikai Uatucarbau. Dalan ne’e sei loke no aterru hodi liga ba fatin turizmu bee Uaibati, Borabo no mós natar no plantasaun kafé, nuu no kamii atu komunidade sira asesu. Dalan ne’e sei benifisia ba ita-nia komunidade husi suku Irabin de Baixo no suku Afaloikai sira”, nia afirma.
Kona-ba torre, nia relata, daudaun tore eletrisidade tolu ne’ebé ameasadu atu monu, impaktu husi udan boot, nune’e presenza IGEADI, I.P halo normalizasaun atu asegura torre referida.
Iha biban ne’e, Prezidente IGEADI, I.P, Ana Paula da Cruz, hatuir, molok ne’e ekipa IGEADI,I.P halo ona levantamentu ba fatin sira-ne’ebé atu halo normalizasaun iha postu Uatucarbau.
“Preokupasaun sira-ne’e hato’o husi xefe suku sira-ne’ebé relata ba ami no ami haree perioriodade tanba torre eletrisidade amesa atu monu, karik ita la halo medida ninia impaktu ba komunidade tanba eletrisidade sei mate. Tan ne’e, ami destaka ekipamentu sira hodi halo normaliza. Ohin ita-nia ekipa sira hahú halo servisu normalizasaun ba mota, torre no dalan. Bazeia ba rezultadu levantamentu husi ekipa IGEADI,I.P ekipamentu sira-ne’e sei destaka iha Uatucarbau durante semana tolu”, nia afirma.
Notísia relevante:MAPPF apoia tratór tula sai komunidade nia hare iha Uatucarbau-Uatulari
Jornalista : Vitorino Lopes da Costa
Editór : Florencio Miranda Ximenes
